Tirana zyrtare i bashkohet mesazhit të vendeve perëndimore duke dënuar sulmet me raketa të Iranit ndaj Izraelit, ndërsa u bën apel shqiptarëve në Lindjen e Mesme të kontaktojnë me ambasadat në rast se kanë nevojë për ndihmë.
“Shqipëria dënon ashpër sulmin e Iranit ndaj Izraelit. Ky përshkallëzim është një kërcënim i rëndë për sigurinë e Izraelit dhe të gjithë rajonit. Rrezikon të sjellë paqëndrueshmëri dhe shkatërrim më të madh në të gjithë Lindjen e Mesme”, shkruan ministri i Jashtëm Igli Hasani në rrjetin social “X”, këtë të diel.
“Këshillojmë shqiptarët në këtë rajon, të ndjekin udhëzimet e autoriteteve lokale për përditësimet e sigurisë publike dhe të kontaktojnë ambasadat tona për ndihmë”, shton ai.
Albania strongly condemns Iran’s attack on Israel.
This escalation is a grave threat to the security of Israel and the entire region. It risks bringing greater instability and devastation across the Middle East.
Albanians in the region are advised to follow the instructions…
— Igli Hasani (@IgliHasani) April 14, 2024
Në një reagim gjatë orëve të vona të së shtunës, Ministria e Jashtme u bëri apel shqiptarëve me qëndrim të përkohshëm apo të përhershëm në Izrael, “të ndjekin e të zbatojnë udhëzimet e sigurisë, të bëra publike së fundmi nga autoritetet vendase”.
Ambasada atashoi dhe numrat e kontaktit për të gjithë shqiptarët në Izrael që kanë nevojë për ndihmë. “Për çdo nevojë të mundshme të kontaktojnë në telefon dhe WhatsApp me numrat e kontaktit të Ambasadës së Republikës së Shqipërisë në Izrael: +972 54-904-2813 dhe +972 54-480-6601”, tha Ministria e Jashtme përmes një njoftimi.
Forcat iraniane nisën sulme ajrore kundër Izraelit, natën mes 13 dhe 14 prillit. Izraeli, megjithatë, tha se forcat e tij dhe ato aleate rrëzuan shumicën e raketave dhe dronëve përpara se ato të godisnin.
Sulmi i Iranit u dënua njerëzi nga shtetet Perëndimore. Irani siluroi Izraelin pas një sulmi në konsullatën e Iranit në Siri, më 1 prill, kur u vranë shtatë oficerë ushtarakë, përfshirë një komandant të lartë. Irani e akuzoi Izraelin për kryerjen e këtij sulmi, ndërsa Izraeli as nuk e konfirmoi, as nuk e mohoi.
Discussion about this post