Edhe pse ka patur sulme me raketa, Shtëpia e Bardhë njoftoi se operacionet në aeroportin e Kabulit në Afganistan do vazhdojnë pa ndërprerje. Një zyrtar amerikan i tha agjencisë së lajmeve “Reuters” se bëhej fjalë për disa raketa ku ishin asgjësuar nga një sistem i mbrojtjes raketore.
Evakuimet vazhdojnë mes përkeqësimit të situatës së sigurisë, përfshirë një sulm vetëvrasës jashtë aeroportit të enjten, i cili shkaktoi vdekjen e të paktën 169 civilëve afganë si dhe 13 ushtarëve amerikanë. Shtetet e Bashkuara po punojnë për të përfunduar evakuimet nga Kabuli para 31 gushtit, që shënon dhe afatit e fundit për qëndrimin e forcave amerikane në Afganistan.
Ndërkohë ushtria amerikane po heton rreth njoftimeve për civilë të vrarë pas një sulmi ajror të dielën, që u tha se eliminoi një kërcënim të afërt të ISIS-K (Shteti Islamik në Khorasan) ndaj aeroportit ndërkombëtar Hamid Karzai.
Bill Urban zëdhënësi i CENTCOM (Komandës Qendrore të Shteteve të Bashkuara), në një deklaratë të dielën në mbrëmje, tha se pasojat e sulmit ajror ishin ende duke u vlerësuar dhe se shpërthimet dytësore “mund të kenë shkaktuar viktima të tjera”.
“Është e paqartë se çfarë mund të ketë ndodhur dhe ne jemi duke hetuar”, tha ai.
Sipas Shtëpisë së Bardhë prej fundit të korrikut deri sot (e hënë) janë evakuuar nga Kabuli rreth 122,000 persona.
“Dy ditët e fundit janë periudha më rrezikshme për shkak të një misioni jashtëzakonisht të rrezikshëm”, tha të dielën Sekretari i Shtetit Antony Blinken për rrjetin televiziv ABC.
