Një ngjarje e rëndë ka ndodhur të hënën në Ferizaj, ku një burrë ka ther me thikë 4 kalimtarë të rastit.
Siç bëhet e ditur, tre prej katër personave të lënduar po trajtohen në Klinikën Emergjente në Qendrën Klinike Universitare të Kosovës (QKUK).
Drejtori i Klinikës Emergjente në QKUK, Naser Syla, ka bërë të ditur se një prej viktimave, e moshës rreth 10 vjeçare, ndodhet në gjendje të rëndë.
“Këta dy të tjerët janë në gjendje stabile,” përfundoi Syla.
Zëdhënësi i policisë për rajonin e Ferizajt, Kanun Veseli, tha se i dyshuari është shoqëruar në stacionin e policisë në Ferizaj nën masa të sigurisë.
Veseli gjithashtu konfirmoi se hetuesit dhe kriminalistët rajonal janë duke analizuar vendet e incidentit dhe kanë gjetur një mjet të mprehtë, që besohet të jetë përdorur gjatë sulmit.
Policia thotë se ende nuk dihen motivet e këtij sulmi.
Kryetari i Ferizajt, Agim Aliu, ka reaguar pas incidentit të ndodhur në këtë komunë, ku katër qytetarë u therën me thikë.
Ai e ka quajtur lajmin tronditës, duke theksuar se dy prej të lënduarve ishin të mitur, ndërsa dy të tjerë ishin të rritur.
Aliu ka bërë të ditur se autori i këtij akti kriminal u arrestua nga Policia e Kosovës brenda disa minutash.
Në reagimin e tij, Kryetari Aliu ka kërkuar shërim të shpejtë për të lënduarit dhe ka përgëzuar Policinë e Kosovës në Ferizaj për reagimin e shpejtë dhe profesionalizmin në parandalimin e zgjerimit të këtij akti kriminal.
Discussion about this post