Dublini është përfshirë pasditen e së enjtes nga protesta të dhunshme, si një reagim ndaj sulmit me thikë ndaj 5 personave, ngjarje që ndodhi pranë një shkolle fillore.
Policë me veshje speciale dhe mburoja po tentojnë të mbajnë nën kontroll një turmë të irrituar, ndërsa një makinë u përfshi nga flakët.
Demonstruesit e dhunshëm po përpiqen të godasin forcat e policisë, ndërsa përleshjet janë të vazhdueshme.
Më herët policia konfirmoi se mes 5 personave të plagosur nga sulmi me thikë ishin dhe 3 fëmijë. Një nga fëmijët, një vajzë 5-vjeçare dhe një grua rreth të 30-tave ndodhen në gjendje të rëndë.
Në një konferencë për shtyp u njoftua se vajza 5-vjeçare po merrte “trajtim urgjent mjekësor” pas goditjes me thikë në sheshin Parnell.
Gjithashtu u raportua se ishte një “sulm i pavarur” dhe oficerët nuk po e trajtonin atë si të lidhur me terrorin në këtë moment.
Një djalë 5-vjeçar, një vajzë 6-vjeçare dhe një burrë rreth të 50-tave u trajtuan për lëndime më pak të rënda.
Kryeministri irlandez Leo Varadkar tha se një i dyshuar është arrestuar.
“Shërbimet e urgjencës u përgjigjën shumë shpejt dhe ishin në vend brenda pak minutash. Unë i falënderoj ata për këtë. Policia po ndjek një vijë të caktuar hetimi”, tha ai.
Discussion about this post