Sulmi ndaj avokatit Sokol Mëngjesi ka sfond politik dhe është urdhëruar nga kryeministri Edi Rama. Kështu pretendon Partia Demokratike, që deklaron se dhuna ndaj avokatit vjen për shkak të mbrojtjes që ai po bën kreut të PD-së Sali Berisha në procesin gjyqësor që po zhvillohet në Gjykatën e Posaçme për privatizimin e ish-kompleksit sportiv “Partizani”.
“Sot ne mëngjes, tre bandite, te urdhëruar nga Edi Rama, kane sulmuar dhe goditur me leva në kokë në qendër të Tiranës, profesor Sokol Mëngjesin, avokati i mirënjohur i kryetarit të Partisë Demokratike, Sali Berisha. Ky është një akt kriminal dhe hakmarrje e verbër, primitive e Edi Ramës ndaj profesor Sokol Mëngjesit, sepse ai së bashku me kolegët e tij, faktuan para shqiptarëve me prova dhe dokumente zyrtare të pakundërshtueshme, se procesi gjyqësor kundër kryetarit të Partisë Demokratike është një proces kryekëput politik i bazuar ne një piramidë mashtrimi, siç është çështja e Klubit Sportiv Partizani”, tha zëdhënësja e PD-së Floriana Garo, në një deklaratë nga selia blu.
“Duke e goditur me banditë, me urdhër të tij direkt profesor Mëngjesin, dhe duke i shkaktuar atij lëndime të renda, Edi Rama dëshmon frikën dhe panikun që përjeton nga aktet e tij politike kriminale. Ai beson se me dhunë do mund të frikësojë zërin e të vërtetës dhe fshehë krimet e tij politike”, shtoi.
“Me këtë rast, në emër të Partisë Demokratike dënoj me ashpërsinë më të madhe këtë akt banditesk kriminal ndaj profesor Sokol Mëngjesit dhe deklaroj sot se, Edi Rama, ai dhe vetëm ai, personalisht do mbahet përgjegjës për këtë akt të shëmtuar kriminal”, përfundoi ajo.
Discussion about this post