Sulmi ndaj drejtorit të OSHEE/ Shoqërohen 5 persona

Shoqërohen 5 persona lidhur me sulmin ndaj drejtuesit të OSHEE në Lezhë, Edmir Përndreca.

Drejtori i Njësisë së Operatorit të Shpërndarjes së Energjisë Elektrike, u dhunua më 30-nëntor të këtij viti, duke u goditur me sende të forta.

Si autor të dyshuar të ngjarjes janë shoqëruar në polici 5 persona, ku për tre prej tyre është lëshuar urdhër-arrest.

Ndalimi i tyre u bë në orët e para të mëngjesit të së mërkurës me urdhër të Prokurorisë së Lezhës, e cila pas veprimeve intensive hetimore arriti të identifikoj dhunuesit, emrat e të cilëve ende nuk janë bërë të ditur.

Ngjarja

Drejtori i Njësisë së Operatorit të Shpërndarjes së Energjisë Elektrike në Lezhë, Edmir Përndreca thotë se nuk i njohu tre personat që e dhunuan.

43 vjeçari ka theksuar se po udhëtonte me makinën e punës kur e sulmua.

“Më ndoqën dhe më goditën makinën. Sa zbrita më goditën me leva. Ishin tre persona, por nuk arrita t’i identifikoj,” ka thënë ai nga Spitali i Traumës ku u trajtua për plagët që mori nga goditjet me levë.

Sulmi vjen pas itensifikimit të kontrolleve të OSHEE, për vjedhje apo ndërprerje të energjisë elektrike ndaj abonteve debitor.

Autorët besohet se kanë ndjekur lëvizjet e drejtorit të OSHEE dhe më pas i bënë pritë, duke i përplasur mjetin dhe më pas e qëlluan me sende të forta.

Nga të dhënat hetimore, autorët ishin të paktën tre persona.

Policia e Lezhës ka sekuestruar pamjet e kamerave të sigurisë, në disa biznese përgjatë rrugës Lezhë – Shënkoll, me qëllim identifikimin dhe më pas arrestimin e dhunuesve të drejtorit të OSHEE.

Edmir Përndreca është emëruar drejtor i Njësisë së Operatorit të Shpërndarjes së Energjisë Elektrike në Lezhë, prej më shumë se 1 viti, ndërsa ka një karrierë të gjatë, të punës si inxhinier pranë këtij institucioni.