Detaje të reja nga hetimet lidhur me ngjarjen e 25 dhjetorit 2024 në ambientet e kompanisë telefonike në Laprakë. Sipas burimeve nga prokuroria dhe policia më 25 dhjetor 2024 dy persona të maskuar u futën në katin e tretë të godinës së telefonike, duke thyer drynin e derës së pasme. Nga hetimet e deritanishme rezulton se dy personat nuk ka vjedhur, por ata janë futur në sallën e mbledhjeve dhe kanë prishur disa prej pajisjeve që ndodheshin aty, duke i shkatërruar ato.
Edhe pse ngjarja u konstatua, punonjësit dhe rojet e Sigurisë së kompanisë “Nazeri 2000” vendosën ta fshinin ngjarjen dhe nuk bënë kallëzim në polici. Vetëm 3 muaj pas ngjarjes kur në media u publikua një foto e dy personave të maskuar që hyjnë në godinë atëherë edhe Policia nisi hetimin ku procedoi penalisht 8 persona. Po ashtu policia dhe prokuroria po marrin çdo ditë në pyetje punonjës të kompanisë dhe të kompanisë që merret me sigurinë e kompanisë. Rojet e sigurisë të kompanise “Nazeri” janë marrë në pyetje nga grupi hetimor, ku kanë deklaruar se nuk e kanë raportuar ngjarjen sepse nuk donin që të prishnin imazhin e kompanisë .
Hetuesit po marrin çdo ditë në pyetje edhe punonjësit e kompanisë . Po ashtu prokuroria dhe policia kanë nisur edhe këqyrjen e tabulateve telefonike të punonjësve të kompanisë dhe kontaktet e tyre me drejtuesit e kompanisë më datë 25 dhjetor 2024 dhe më pas për të zbuluar arsyen pse e fshehën ngjarjen. Deri në këto momente të hetimeve të kryera prokuroria nuk ka ende një pistë konkrete pse u shkatërruan disa pajisje të kompanisë telefonike. Grupi hetimor ka arritur të zbulojë se një pjesë e kamerave të sigurisë më datë 25 dhjetor 2024 ditën e ngjarjes nuk funksiononin në kompani.
Discussion about this post