Deputetët e mazhorancës dhe të opozitës janë bërë bashkë në Komisionin e Sigurisë dhe kanë rënë dakord që të thërrasin në seancë dëgjimore të gjitha institucionet e sigurisë në vend në lidhje me sulmin kibernetik të Iranit.
Ka qenë deputeti i PD, Ervin Salianji i cili ka bërë propozimin, duke thënë se mes të ftuarve duhet të jetë edhe kryeministri Rama për të dhënë informacione për këtë sulm. Edhe deputeti tjetër i PD, Flamur Noka kërkoi që të jepen sqarim se ku kanë shkuar 195 mln euro që janë shpenzuar për mirëmbajtjen e sistemeve.
Diskutimet në Komisionin e Sigurisë:
Salianji: Duke qenë në një sulm nga një shtet i huaj, ne e dënojmë sulmin kriminal nga një shtet i huaj, por si komision siguri besoj duhet të biem dakord që mos e bëjmë vetëm ne si opozitë një kërkesë për të pasur në këtë komision, kreun e SHISH, AKSHIN apo përfaqësues nga qeveria, ministri i mbrojtjes mbase në një seancë tjetër apo edhe kryeministri për të informuar për një çështje që është agresion ndaj shtetit dhe nuk mundet që komisioni të mos ketë asnjë informacion deri më sot. Duhet thënë që sipas Microsoft një sulm i nisur që vitin e kaluar, duhet parë sesa të ekspozuar dhe të paaftë jemi ne dhe ku mund të ndihmojë ne që shteti shqiptar mos kthehet në një hallkë e dobët e aleancës. Kështu që kërkoj edhe dakordësinë tuaj për ë pasur një seancë të gjatë me krerët e institucioneve për këtë çështje sensitive dhe ndër më të rëndësishmet që ka kaluar Shqipëria.
Naço: Bie dakord me kërkesën tuaj. Të mblidhet edhe kryesia e komisionit dhe të rakordojmë. Është një çështje sensitive për të gjithë. Nëse duhet të jemi ndonjë ditë bashkë, kjo është dita për të marrë masat dhe për të përballuar këtë agresion kibernetik ndaj shtetit tonë. Një seancë që do jetë me dyer të mbyllura dhe nuk do jetë për publikun.
Noka: Në të njëjtën linjë me Salianjin. Ne po autorizojmë kryesinë e komisionit që ti parashtrojë situatën institucioneve, duke filluar nga AKSHI, duke filluar tek Ministria e Brendshme dhe të gjitha institucionet e sigurisë duhet ti thërrasim një nga një. Çdo kush prej nesh e dënon rëndë një sulm ndaj një shteti anëtar të NATO-s, por do të na duhet të analizojmë edhe problematikat, si u shkaktua kjo situatë. Ne kemi kaluar në këtë komision kontrata me vlera të mëdha që garantonin mbrojtjen nga sulmet dhe jepnin sigurinë kibernetik të gjitha sistemeve të këtij vendi. Fakti që kontratat kapnin shifrën e 195 mln euro dhe përsëri sistemi është i sulmueshëm do të thotë që ka nevojë të jepen shpjegimet ku shkuan paratë, se mos u bënë edhe këto rrush e kumbulla si të tjerat.
Discussion about this post