Sulmi në Ankara, reagon Erdogan: Luftë deri në terroristin e fundit

Pas sulmit terrorist mbi ministrinë e Brendshme në Ankara, presidenti turk Recep Tayyip Erdogan ka thënë se nuk do të dorëzohen para akteve terroriste.

Gjatë adresimit të tij sot në Parlamentin turk që edhe hapi dyert nga pushimi tremujor i verës, Erdogan foli para ligjvënësve turq.

Fjalimi i tij erdhi disa orë, pasi dy persona të armatosur me pushkë automatike dhe jelek me eksploziv të sulmonin ndërtesën e ministrisë së Brendshme.

Në këtë sulm njëri nga sulmuesit hodhi veten në erë, derisa tjetri u neutralizua nga policia turke. E nga ky sulm mbetën të plagosur lehtë dy pjesëtarë të policisë.

Ai e ka lidhur sulmin me aktivitete të tilla të ngjashme që kanë ndodhur më parë në Turqi, duke thënë se Ankaraja zyrtare do të vazhdojë luftën brenda dhe jashtë vendit derisa terroristi i fundit të eliminohet.

“Ne nuk do të lejojmë që organizata terroriste të drejtojë politikën apo të pengojë marshimin e shenjtë të vendit tonë. Aksioni në të cilin u neutralizuan dy vrasës mëngjesin e sotëm është lufta e fundit e organizatës terroriste. Terroristët që kërcënojnë qetësinë dhe sigurinë e qytetarëve nuk i kanë arritur qëllimet dhe nuk do t’i arrijnë kurrë.

Ne nuk lejojmë propagandë nga ata që tentojnë të minojnë vullnetin kombëtar duke përmendur artin. Mendoj se këtë ia kemi borxh kombit tonë që ndaloi tanket natën e 15 korrikut”, është shprehur Rexhep Taip Erdogan, President i Turqisë.

Kritika të ashpra Presidenti turk ka rezervuar edhe për Bashkimin Europian, duke marrë në konsideratë stanjacionin në negociatat për anëtarësimin në union.

“Ne mbajtëm çdo premtim që i bëmë BE-së, por ata nuk mbajtën pothuajse asnjë nga premtimet që na bënë. Nuk ka asnjë ndryshim në qëndrimin e njëanshëm të BE-së ndaj vendit tonë. Ata po i bëjnë padrejtësi vendit tonë me një qasje që shpërfill proceset që ata kanë bërë.

Si Turqi, nuk kemi asnjë pritshmëri nga BE-ja, në derën e së cilës jemi lënë në pritje prej 60 vitesh. Ata duhet të mendohen për padrejtësitë që bëjnë ndaj nesh, veçanërisht për vendosjen e vizave. Nëse nuk e bëjnë, ata humbasin të drejtën për të pasur ndonjë pritshmëri nga ne.

Nëse është e nevojshme, ne nuk do të zbatojmë kriteret e Kopenhagës por kriteret e Ankarasë dhe do të vazhdojmë rrugën tonë”, deklaroi presidenti turk.