FBI dhe agjenci të tjera qeveritare amerikane dështuan të shqyrtonin potencialin e dhunës në kryengritjen e 6 janarit 2021 në selinë e Kongresit amerikan, Capitol Hill.
Kështu thotë një raport i ri i një paneli demokrat të Senatit amerikan, sipas të cilit FBI dhe Departamenti i Sigurisë së Brendshme nënvlerësuan rreziqet dhe nuk morën masat e duhura.
Raporti me 105 faqe u publikua të martën dhe kritikon zyrtarët për neglizhencë dhe reagim të ngadaltë ndaj informacioneve të mara.
“Në nivel rrënjësor, agjencitë dështuan të përmbushnin misionin e tyre dhe të bënin lidhjen e informacioneve publike dhe jopublike që morën”, thuhet në raport.
Në të shtohet se krerët e agjencive nuk u dhanë udhëzime zyrave partnere me urgjencën e duhur dhe nuk dhanë alarmin për t’u mundësuar atyre përgatitjen për aktet e dhunës që u verifikuan.
Raporti ofron shembuj specifikë të tipit të paralajmërimeve që mori FBI, përfshirë aktivitetin online të ekstremistëve, informacionet në rrugë jozyrtare dhe të dhënat e oficerëve në terren.
Një prej këtyre shembujve është një mesazh i postuar në rrjetin social “Parler”, drejtuar pikërisht FBI-së 4 ditë para kryengritjes.
“Kjo është qëndresa e fundit dhe ne do të kalojmë vijën e kuqe në Capitol Hill. Mos u habisni nëse ne marrim nën kontroll ndërtesën”, thuhej në mesazh.
Ajo që njihet si kryengritja e 6 janarit erdhi pasi mbështetësit e Donald Trump u rebeluan ndaj humbjes së tij në zgjedhjet presidenciale përballë kandidatit fitues, Joe Biden.
Discussion about this post