Sulmi në Deçan, Haradinaj: Veprim i ulët kriminal, apeloj organet e rendit të kapin autorin!

Pas sulmit me armë ku mbetën të vrarë 4 persona dhe dy të tjerë u plagosën në Gllogjan, ka reaguar edhe ish-kryeministri i Kosovës, Ramush Haradinaj.

Ai shkruan se ky është një sulm kriminal dhe se apelon organet e renit që të zbulojnë dhe të kapin sa më parë autorin e ngjarjes.

“I trishtuar nga sulmi kriminal që ndodhi në Gllogjan, ku humbën jetën tre persona, prej të cilëve dy nxënës. Bashkëndjejmë me familjarët e të vrarëve, duke u lutur për durim dhe forcë, në këto momente të rënda për të gjithë ne. Falënderoj kryetarin Bashkim Ramosaj, Policinë, Prokurorinë dhe ekipet mjekësore emergjente për punën e tyre. Apeloj që organet e rendit sa më parë, të zbulojnë e të kapin autorin e këtij veprimi të ulët kriminal dhe i njëjti të sillet para drejtësisë” – shkruan Haradinaj.

Kujtojmë se nga të shtënat me armë kanë humbur jetën 4 persona, shoferi i autobusit, i cili ka vdekur në vend, faturinoja dhe dy nxënës. Ndërkohë kanë mbetur të plagosur dy nxënës të tjerë.