Ministri i Punëve të Brendshme të Kosovës, Xhelal Sveçla i ka dhënë ultimatum vrasësit të tre personave në Gllogjan të Deçanit që të dorëzohet sa më shpejtë në Polici.
Përmes një konference për media, Ministri i Brendshëm theksoi se kanë vënë në dispozicion të gjitha kapacitetet që të zbulojnë këtë rast.
“Me të marrë lajmin jam kthyer në Kosovë dhe jam nisur drejt Deçanit për të takuar gjithë strukturat policore, por edhe prokurorët e rastit dhe për të shprehur gatishmërinë tonë që të vëmë në funksion gjithë kapacitetet e shtetit në zbulimin e këtij rasti, dhe lehtësimin e dhimbjeve për familjarët. Dua të bëjë ftesë të gjithë qytetarëve që për çfarëdo informacioni t’i drejtohen Policisë dhe rasti të zgjidhet sa më parë” – deklaroi ai.
Ai gjithashtu ka thënë se janë duke u hetuar në disa pista dhe se i ka bërë thirrje autorit dhe bashkëpunëtorëve të tij që të dorëzohen për të mirën e tyre.
“Tashmë kemi informacione të ndryshme, të cilat policia nën direktivat e prokurorisë është duke i trajtuar. Janë dukë u trajtuar disa pista. Po ashtu, i bëj ultimatum vrasësit të dorëzohet, për shkak se për çdo ditë ai rëndon të tjerët, kushdo që ndihmon vrasësit implikohet me vepër penale. Sa më parë që dorëzohet aq më mirë për rrethin e tij. Unë mund të garantoj se jemi të vendosur që kapacitetet tona shtetërorë janë në dispozicion të zbulimit të rastit. Policia po koordinohet edhe me AKI” – u shpreh ai.
Kujtojmë që mbrëmë rreth orës 19:00 është sulmuar me armë zjarri një autobus në Gllogjan të Deçanit, ku të vrarë kanë mbetur tre persona, shoferi dhe dy nxënës. Autori i krimit ka qenë i maskuar, ndërkohë Policia është në kërkim të tij. Policia bëri me dije se autobusi është sulmuar me armë zjarri AK-47.
Discussion about this post