Presidenti amerikan, Joe Biden, tha pas sulmit në Kabul se Amerika nuk do të harrojë dhe nuk do të falë.
“Për ata që kryen këtë sulm, si dhe për këdo tjetër që e dëshiron Amerikën të dëmtuar: Ne nuk do të falim. Ne nuk do të harrojmë. Ne do t’ju ndjekim dhe do t’ju detyrojmë të paguani”, tha Biden nga Shtëpia e Bardhë.
Disa njerëz janë vrarë dhe shumë tjerë janë plagosur nga dy sulme vetëvrasëse me bombë që kanë tronditur aeroportin e Kabulit.
Incidenti ka shtuar kaosin në aeroport disa ditë para datës 31 gusht kur duhet të përfundojë tërheqja e plotë trupave të huaja nga Afganistani. Biden siguroi se terroristët nuk do të mund ta pengojnë misionin e evakuimit të amerikanëve nga Afganistani.
Kreu i Komandës Qendrore të SHBA-së, gjenerali, Kenneth McKenzie, tha se 12 ushtarakë amerikanë ishin në mesin e atyre që u vranë. Zyrtarët shëndetësorë në Kabul u cituan të thoshin se 60 civilë u vranë.
Përgjegjësinë për sulmin e mori grupi ekstremist i Shtetit Islamik ISIS.
“Ne nuk do të pengohemi nga terroristët. Ne nuk do të ndalojmë misionin. Ne do të vazhdojmë evakuimin”, tha Biden.
Ai lë të kuptohet se sulmuesit mund të kenë ardhur nga burgjet që u hapën nga talibanët gjatë marrjes së kontrollit të Afganistanit.
Biden tha se e ndjen dhimbjen që kanë familjet e viktimave në Kabul, duke e krahasuar me dhimbjen që ka pasur familja Biden pas vdekjes së djalit të tij, Beau Baiden, pasi kishte shërbyer në Kosovë dhe Irak.
