Të hënën rreth orës 23:50, dy persona janë lënduar në rrugën “Knjaz Millosh” në Mitrovicën e Veriut, si pasojë e shpërthimit të një granate dore afër një hoteli.
Njëri nga të lënduarit është në gjendje të rëndë shëndetësore dhe se pritet të transferohet për trajtim në Beograd.
Zëvendësdrejtori i Policisë për rajonin e veriut, Veton Elshani tha se lidhur me këtë rast, ende nuk është arrestuar ndonjë person dhe se nuk beson që rasti ka të bëjë me çështje etnike.
“Ende nuk ka të arrestuar, derisa nuk kemi arsye të besojmë që ky rast ka lidhje me çështje etnike”, tha Elshani.
Personat e përfshirë në këtë rast janë të nacionalitetit serb dhe rasti mbetet duke u hetuar.
“Rreth orës 23:50, dyshohet se ka shpërthyer një granatë dore te hoteli ‘Bisevac’ në Mitrovicë të Veriut. Si pasojë e shpërthimit janë dëmtuar 4-5 vetura dhe dy persona janë lënduar, njëri prej tyre ka lëndime më të rënda, por jashtë rrezikut për jetë. Njësitet policore relevante janë në vendin e ngjarjes dhe po merren me rastin”, njoftoi policia.
Discussion about this post