Autoritetet turke thanë se kishin goditur pozicione ushtarake në Siri dhe Irak të lidhura me grupin militant kurd PKK, pasi e fajësuan atë për sulmin terrorist të së mërkurës në Ankara, ku mbetën të vrarë të paktën 5 persona. Video të postuara në rrjet treguan dy persona të armatosur teksa qëllonin rreth hyrjes së Agjencisë Hapësinore turke, e cila gjendet 40 km larg kryeqytetit Ankara. Deri më tani askush nuk ka marrë përsipër përgjegjësinë për sulmin që la të plagosur 22 vetë.
Siç bëri të ditur ministria e Mbrojtjes në një deklaratë, një total prej 32 objektivësh që i përkisnin terroristëve u shkatërruan me sukses gjatë reprezaljes kundër PKK në Irak dhe Siri.
“Duke e krahasuar sulmin me shumë të tjera të ngjashme në të kaluarën, vlerësojmë se pasi tij, me gjasë qëndron organizata terroriste e PKK. Po kjo do të konfirmohet sapo të kemi përcaktuar identitetet e agresorëve që do t’i bëjmë më pas publike”, tha zëvendës presidenti turk, Cevdet Yilmaz.
Në një deklaratë të sotme nga spitali ku vizitoi të plagosurit, ai tha se ata që kryejnë akte terroriste nuk do të arrijnë qëllimin për të shkatërruar paqen në Turqi, por do të rrisin fuqinë mbrojtëse.
“Ata nuk do të mund të shkatërrojnë paqen e vendit tonë, as nuk do të mund të pengojnë marshimin tonë të fortë në industrinë e mbrojtjes. Përkundrazi, këto ngjarje të neveritshme do të rrisin më tej vendosmërinë tonë në industrinë e mbrojtjes dhe ndjeshmërinë tonë për unitetin, solidaritetin dhe vëllazërinë e vendit tonë. Ne do të vazhdojmë luftën tonë të vendosur kundër terrorizmit në unitet, solidaritet dhe unitet kombëtar, me punën e fortë të të gjithëve institucioneve tona”, u shpreh Cevdet Yilmaz.
Autoritetet njoftuan se 4 nga viktimat ishin punonjës të Agjencisë Hapësinore, ndërsa i pesti, shofer taksie. Sipas mediave lokale agresorët, një burrë dhe një grua kishin vrarë shoferin e taksisë para se të merrnin automjetin e tij për të realizuar sulmin.
Shpërthime dhe të shtëna u dëgjuan më vonë pranë kompleksit, me pamjet që treguan kolona të mëdha tymi dhe një zjarr të madh. Siç bëhet e ditur agresorët janë vrarë.
Nga Kazani i Rusisë, ku po merr pjesë në samitin e Brics, presidenti turk Rexhep Taip Erdogan e dënoi sulmin gjatë një konference për shtyp me homologun Vladimir Putin, dhe e cilësoi atë si një akt të neveritshëm terrorist.
Discussion about this post