Sali Berisha, në konferencën me gazetarët, u pyet në lidhje me një deklaratë të kryeministrit Rama dhënë për Politico, i cili tha se “Shqipëria mund të shërbejë si hapësirë ushtarake që SHBA të sulmojë Iranin”.
Berisha u shpreh se Amerika është vendi udhëheqës i NATO-s dhe si i tillë nuk mund t’i bllokohen bazat. Sipas tij disa vende të NATO-s e kanë bërë këtë gjë, që sipas tij nuk duhet të kishte ndodhur.
“Risk ka- deklaroi Berisha, por duhet marrë përsipër ai risk”, përderisa je një vend anëtar i NATO-s.
“Shqipëria është vend anëtar i NATO-s dhe në opinionin tim, NATO është organizata politiko ushtarake më e fuqishme në botë për faktin e vetëm se ajo udhëhiqet nga fuqia politike dhe ushtarake në botë që janë SHBA.
Në këtë kuadër unë duhet të jem shumë i hapur. Nuk mund të justifikoj kurrë që t’i bllokohen bazat, fluturimet vendit udhëheqës të NATO-s për një fushë betejë tjetër. Kjo ka ndodhur, nuk mund ta mohoj. Këtë e bënë disa vende, të tjera nuk e bënë. Në vlerësimin tim kjo nuk mund të bëhej.
Nëse ti je i vetëdijshëm që vendi udhëheqës i Aleancës janë SHBA dhe ke pranuar bazat e tyre me avion, me dron e mjete të tjera, nuk më është dukur një veprim i duhur bllokimi i këtyre bazave.
A paraqesin një risk? Po, por do ta marrësh atë risk. Mos harrojmë një gjë, ajo është një luftë, e cila faktoi ndër të tjera në mënyrën më të pamohueshme, nuk duhet të konfuzionohemi nga propaganda, por kjo luftë faktoi se për fatin më të keq, fluksi jashtëzakonisht më i rëndësishëm i energjisë në botë, kontrollohej nga një regjim që nuk duhet të kontrollohej kurrë. Ç’punë ke ti me naftën e të tjerëve, ti ke naftën tendë. Por Irani e kishte strategji këtë. Evropa mendoj se pagoi një çmim shumë më të shtrenjtë sesa goditjen nga një dron apo 5 dron të Ajatollahëve. Unë nuk konceptoj që vendit udhëheqës të NATO-s të mos i lejohen bazat, operacionit apo fluturimit në një zonë ku ai është në luftë”, tha Berisha.
Ndërsa në lidhje me kritikat që Kryeministri Rama i bëri Bashkimit Evropian në lidhje me qëndrimin që po mban ndaj Rusisë në luftë më Ukrainën, Berisha tha se “ai e bën për të shpëtuar lëkurën e tij”.
“Ky është një kameleon pa shtyllë kurrizore që mendon se duke notuar për vetën e tij mund të ndikojë të tjerët. Ju rikujtoj, para 3 muajve Edi Rama në Samitin Politik të Evropës deklaroi se Evropa nuk ka nevojë për këshilla përtej atlantikut, Evropa është paqja tha, është kulturua e paqes, është paqja vetë dhe nuk ka nevojë të këshillohet përtej atlantikut. Tani del dhe i jep mësime Evropës së çfarë qëndrimi të mbajë ndaj Putinit dhe agresionit në Ukrainë. Janë shërbime që përpiqet ti bëjë lëkurës së tij”, u shpreh lideri opozitar.
Discussion about this post