Policia e Kosovës është sulmuar në Mitrovicën e Veriut në orët e para të mëngjesit të sotëm. Ngjarja ndodhi rreth orës 02:20, në rrugën “Ivo Llola Ribar”, tek Qendra e kontrollimit teknik të automjeteve. Në drejtim të zyrtarëve policorë që ndodheshin në detyrë zyrtare (njësia në pikë statike), është hedhur nga persona të panjohur një mjet i dyshuar shpërthyes.
Policia dyshon se mjeti shpërthyes i hedhur në drejtim të zyrtarëve policorë ishte shok bombë.
“Njësitet kompetente policore dhe krim teknika kanë dalë në vendin e ngjarjes dhe kanë kryer procedurat e nevojshme të vend shikimit Lidhur me rastin është njoftuar edhe Prokurori i shtetit i cili ka urdhëruar inicimin e rastit si ’Sulm ndaj personit zyrtar’ dhe hetime intensive për zbardhjen e këtij rasti janë në proces”, thuhet në njoftimin e Policisë.
Policia e Kosovës thotë se “pavarësisht akteve të tilla nga individë apo grupe të caktuara kriminale mbetet e përkushtuar në realizimin e detyrave dhe autorizimeve ligjore në funksion të ruajtjes së rendit, garantimit të sigurisë së qytetarëve pa dallim, si dhe arrestimin dhe sjelljen sa më parë para organeve të drejtësisë të personave të dyshuar të përfshirë në raste të tilla”
Ky incident vjen pas disa rasteve të raportuara për djegie të veturave me targa RKS në veri të Kosovës, zonë e banuar me shumicë serbe.
Discussion about this post