Partizani ka mbyllur ditën e djeshme përgatitjet për ndeshjen e javës së nëntë ndaj Teutës, ku do të synojë të kthehet te fitorja pas barazimit aspak të këndshëm ndaj Kastriotit në javën e shkuar.
Gjatë javës Kolela i ka pasur lojtarët të gjithë, por vetëm para dy ditësh të kuqtë janë përballur me një shqetësim muskulor të Alfred Mensah. Ganezi e ka nisur këtë sezon plot shqetësime, si të ishte prej qelqi. Ai mungoi thuajse një muaj pasi luajti vetëm ndeshjen e parë, teksa edhe rikthimi nuk ka zgjatur shumë. Ai ka reklamuar një shqetësim të vogël muskulor, që do e mbajë jashtë ndeshjes me Teutën. Ai është mungesa e vetme për sfidën e sotme.
RIKTHIMET – Dy lojtarë i bashkohen skuadrës, pa mungesave në ndeshjen e fundit. Arinaldo Rrapaj ka shlyer pezullimin e ndëshkimit me katër kartonë të verdhë dhe pritet menjëherë në formacion. Nga ana tjetër, Bruno Telushi i ka kaluar problemet fizike të shfaqura që në derbin me Tiranën dhe është gati për sfidën e sotme me durrsakët.
FORMACIONI – As ndaj Teutës nuk priten shumë ndryshime në formacion nga Kolela, i cili dalëngadalë po e profilizon 11-shen. Dyshimi i vetëm është aktivizimi apo jo i Carës në sulm, por shanset me të mëdha janë që kavajasi të ulet në stol për të lënë tridentin Da Silva-Hoti-Skuka. Në mesfushë rikthehet Arinaldo Rrapaj, i palëvizshëm nga 11-shja.
Discussion about this post