Salah pritet si ‘Faraon’ në Stamboll nga mijëra tifozë të Trabzonsporit

Mohamed Salah ka mbërritur në Stamboll për të nisur zyrtarisht aventurën e tij të re me Trabzonsporin.

Ylli egjiptian u prit nga një numër i madh tifozësh, të cilët i rezervuan një pritje madhështore në aeroport.

34-vjeçari u shfaq për herë të parë me fanellën e Trabzonsporit, duke rritur entuziazmin e tifozëve për transferimin e tij.

Salah do t’u nënshtrohet fillimisht testeve mjekësore në Stamboll, përpara se të udhëtojë drejt Trabzonit për prezantimin zyrtar.

Më pas, ai pritet të firmosë një kontratë dyvjeçare me klubin turk.

Sulmuesi i kombëtares së Egjiptit i bashkohet Trabzonsporit si lojtar i lirë, pas përfundimit të aventurës së tij në Liverpool.

Klubi turk kishte konfirmuar më herët se negociatat mes palëve ishin në fazën finale.

Transferimi i Salah konsiderohet një nga goditjet më të bujshme në historinë e futbollit turk.

Pas nëntë sezonesh të mbushura me trofe, gola dhe rekorde te Liverpooli, egjiptiani është gati të nisë një kapitull të ri në karrierën e tij.