Blerja e bujshme e Eg natias, Jurguens Montenegro, pritet të mos grumbullohet në ndeshjen e sotme kundër Skënderbeut, që do të luhet në orën 13:30 në stadiumin e Rrogozhinës. “Panorama Sport” mëson se sulmuesi nga Kosta Rika ka përfunduar në spital gjatë ditës së premte, pasi dyshohet se është helmuar.
23-vjeçari ka marrë serum dhe burime në klubin rrogozhinas tregojnë se gjendja e tij është e stabilizuar tashmë. Gjithsesi, janë të pakta gjasat që debutimi i tij të bëhet sot. Për të blerë kartonin e Montenegros, klubi rrogozhinas pagoi 150 mijë euro te skuadra nga Kosta Rika, Alajuelense.
Ndërkohë, trajneri Edlir Tetova, beson se skuadra e tij do t’a nisë mbarë vitin 2024. Në intervistën për gazetën, durrsaku theksoi se objektivi i klubit nuk ndryshon, teksa deri në fund do të luftohet për titullin.
Edlir, e nisni kundër një skuadre si Skënderbeu, që ju ka marrë 4 pikë në dy fazat e para. Çfarë prisni nga ky duel?
Jemi koshientë që përballë do të kemi një skuadër të vështirë dhe të rrezikshme në repartin ofensiv. Jam munduar të punoj me futbollistët që kam në dispozicion për të analizuar dhe marrë masa, me qëllim për të interpretuar si duhet këtë sfidë. Do të futemi në fushë për maksimumin, duke e nisur vitin në mënyrën më të mirë të mundshme.
Jeni i kënaqur me lëvizjet që janë bërë në merkato?
Janë afruar katër lojtarë, të cilët kanë cilësi dhe do të na japin një dorë për pjesën e dytë të sezonit. Tani, puna jonë e përbashkët është që të përshtatemi për të qenë një trup i vetëm, siç duhet të jetë minimalisht një ekip futbolli. Edhe pse lojtarët e afruar në këtë merkato dimri kanë pak ditë që kanë ardhur, shikoj progres dhe ky fakt më lumturon.
Sulmuesi Montenegro dhe mesfushori Ibrahimoglu janë dy emra të cilët kanë ardhur me bujë tek Egnatia. Çfarë prisni prej tyre?
Janë dy lojtarë që besoj se do të bëjnë mirë. U ka mjaftuar pak kohë për të dhënë sinjale pozitive në stërvitje. Shikoj tek ata dëshirë për të bërë mirë, siç kanë bërë pjesa dërrmuese e futbollistëve që kemi transferuar në këto vite që klubi është në Superiore. Unë jam i lumtur që do t’i drejtoj këta futbollistë dhe kam bindjen se shumë shpejt do marrin vëmendjen e të gjithëve me paraqitjet e tyre.
Largimet e Mustës, Isgandarlit dhe Paulauskasit, e kanë dobësuar ekipin?
Ishin lojtarë të rëndësishëm që e treguan në fushën e lojës produktivitetin e tyre. Ata nuk janë me ne dhe nuk më mbetet tjetër gjë veçse t’u uroj suksese. Siç edhe e kemi dëshmuar, Egnatian nuk e bëjnë individët e caktuar, por grupi. Ne forcën e gjejmë tek njëri-tjetri. Di të them që do vijojmë të vazhdojmë rrugëtimin tonë më të fortë se kurrë, pasi dëshira dhe cilësitë që kemi nuk mungojnë.
Me këtë kontigjent lojtarësh që keni, do vijoni të keni objektiv titullin?
Objektivi ynë nuk ndryshon nga ai që kemi vendosur në fillim të sezonit. Do mundohemi t’i marrim ndeshjet një e nga një, pasi çdo ekip dhe çdo 90- minutësh ka specifikat e veta. Unë jam besimplotë se së bashku me stafin e mrekullueshëm që punoj çdo ditë, do ia dalim të arrijmë objektivat tona siç bëmë sezonin e kaluar.
Është e vërtetë që prisni të vijë një tjetër sulmues dhe gjithashtu një mbrojtës i djathtë?
Sa i takon ecurisë së merkatos, është stafi ai që merret me këtë punë. Kam biseduar me presidentin mbi objektivat që kemi për të zëvendësuar hapësirat e lëna bosh nga largimet. Nuk mund të them se në çfarë situata janë negociatat, por di të them se skuadra do të përforcohet mjaftueshëm për të përballuar sezonin. Fokusi momental i imi dhe i skuadrës është Skënderbeu. Të kalojmë këtë pengesë më pas të shohim nga merkato.
Discussion about this post