Menjëherë pas deklaratës së tij përpara popullit britanik, ku Rishi Sunak njoftoi dorëheqjen si lider i partisë konservatore, u nis për në pallatin mbretëror.
Ai u takua me mbretin Charl, duke i dorëzuar dorëheqjen për t’i lënë rrugën e lirë emërimit të kryeministrit të ri, Keir Starmer.
Pallati konfirmoi se dorëheqja e Sunak është pranuar nga Mbreti:
“Deputeti i nderuar Rishi Sunak pati një takim me Mbretin këtë mëngjes dhe dha dorëheqjen e tij si kryeministër, gjë që madhështia e tij e pranoi me dashamirësi”.
Nga ana tjetër Keir Starmer është emëruar zyrtarisht si kryeministër nga Mbreti Charl në Buckingham Palace pas një fitoreje dërrmuese në zgjedhjet e përgjithshme të djeshme në Mbretërinë e Bashkuar.
Starmer është larguar nga Buckingham Palace për të shkuar në Downing Street. Ai u shoqërua nga bashkëshortja e tij.
Partia Laburiste i dha fund qeverisjes 14-vjeçare nga Partia Konservatore. Laburistët e qendrës së majtë i kanë fituar shumicën dërrmuese në Parlamentin britanik, që përbëhet prej 650 vendesh, ndërsa Partia Konservatore e Rishi Sunak ka pësuar disfatën më të rëndë në historinë e vet.
Britania ka përjetuar disa vite të trazuara, pjesërisht për fajin e konservatorëve, që kanë shkaktuar pesimizëm në mesin e shumë votuesve për të ardhmen e vendit të tyre.
Discussion about this post