Real Madrid ka siguruar tre pikët në takimin përballë Rayo Vallecanos. Derbi i luajtur në kuadër të javës së 36-të të La Ligas, u mbyll me rezultatin 2-1, duke rikthyer buzëqeshjen në ambjentin e “los Blancos”.
Dueli përballë klubit nga Vallecas, ishte i komplikuar për djemtë e Ancelottit të cilët u përballën me mbrojtjen solide të skuadrës së trajnerit bask, Andoni Iraola.
Madrilënet e zhbllokuan rezultatin në minutën e 31’, falë kapitenit Karim Benzema, i cili shmangu me mjeshtëri, portierin e Rayos, Dimitrievski dhe më pas dërgoi topin në rrjetë për kënaqësinë e tifozëve në Bernabeu.
Me këtë rezultat, u mbyllën 45 minutat e para. Në pjesën e dytë, mbretërorët krijuan shumë raste, por pa i konkretizuar ato. Rastet e shumta të humbura nga vendasit, paraqitën faturën e tyre. Ligji i pa shkruar i futbollit “gol i humbur, gol i pësuar”, u zbatua në minutën e 84’, me Rayo Vallecanon që barazoi shifrat, duke bërë të heshtë Santiago Bernabeu.
Atëherë, kur dukej se takimi do të mbyllej në barazim, Rodrygo realizoi një nga golat më të bukur të sezonit në La Liga. Një aksion personal i brazilianit, në minutën e 89’, u përfundua në mënyrën më perfekte, me një super gol që në fund rezultoi, goli i tre pikëve.
Kjo fitore vlen thjeshtë për statistikë, me Realin e Madridit, që e ka siguruar kualifikimin në Champions League (ndërsa kampionatin e ka humbur prej disa javësh).
Nga ana tjetër, edhe Rayo Vallecano, nuk rrezikohet nga kjo disfatë, duke parë që e ka arritur objektivin sezonal, mbijetesën, prej disa takimesh./m.b /gijotina.com
Discussion about this post