Java e 31 e Kategorisë Superiore u mbyll me fitoren e Elbasanit në sfidën me Partizanin me rezultatin 3-0, një ndeshje ku skuadra e Gvozdenovic iu dha një leksion të mirë Të Kuqve.
Pjesa e parë e ndeshjes ishte argëtuese me skuadrat që kërkuan golin që në minutat e para. Elbasani tentoi me Ze Gomes, ndërkohë që Partizani u kundërpërgjigj me Sidibe. Në minutën e 20, Elbasani mbeti me 10 futbollistë për shkak të ndëshkimit të Mustës me karton të kuq si mbrojtësi i fundit, një vendim që u dha nga sistemi VAR pasi arbitri fillimisht e kishte ndëshkuar me karton të verdhë. Ndeshja u ndërpre për pak minuta pasi tifozët hodhën sende në fushë me Kasën që mori shiritin e kapitenit që foli me ta për t’i qetësuar gjërat. Ndeshja rifilloi por deri në fundin e pjesës së parë rezultati mbeti 0-0.
Në fillimin e pjesës së dytë Elbasani fitoi një 11 metërsh pas një prekje të topit me dorë në zonë të futbollistëve të Partizanit. Ze Gomes shkoi te pika e bardhe por portieri Qirko e priti gjuajtjen e tij. Megjithatë penalltia u përsërit pasi gardiani i Të Kuqve kishte lëvizur këmbën nga vija e portës. Ze Gomes ekzekutoi edhe njëherë 11 metërshin dhe këtë radhë u tregua i saktë duke e dërguar topin në rrjetë për t’i dhënë avantazhin 1-0 Elbasanit. Goli i dha krahë Elbasanit që edhe pse në inferioritet numerik u shfaq i rrezikshëm në portën e Partizanit që nga ana e tij dukej i tulatur. Në minutat e fundit Partizani pati shansin më të mirë për të barazuar teksa gjuajtja e një prej futbollistëve të gtij u ndal nga tramversa. Dhe po nuk shënove do të pësosh, rregulli i pashkruar i futbollit gjeti menjëherë zbatim nga Elbasani që shënoi golin e dytë me Tsague. Por verdheblutë nuk e lanë me kaq dhe në minutat shtesë i dhanë përfundimisht goditjen e knockoutit duke shënuar golin e tretë me Kasën për të fiksuar fitoren 3-0 të Elbasanit që ngjitet në vendin e dytë me 56 pikë, ndërsa Partizani del për momentin jashtë zonës së playoffit teksa mbetet me 44 pikë po aq sa edhe Dinamo që e parakaloi në klasifikim.
gijotina.com/
Discussion about this post