Në orën 19:45, Vllaznia do të presë Dinamon për ndeshjen e javës së pestë të Superligës në stadiumin ‘Loro Boriçi’.
Teksa ka folur në prag të kësaj sfide, trajneri i shkodranëve, Brdariç është shprehur se dëshiron që skuadra e tij të jetë ajo që do i shkaktojë humbjen e parë për këtë sezon ‘Bluve’ të kryeqytetit.
“Duam t’ia shkaktojmë humbjen e parë Dinamos, mendoj se ekipet janë të balancuara dhe do të mundohemi të jemi në ditë të mirë për të treguar punën që kemi bërë gjatë gjithë javës.”- tha ai.
Më tej kreu i stolit të ‘Kuqebluve’ shtoi se kjo është një ndeshje shumë e rëndësishme edhe për faktin se do luajnë në shtëpi, ndaj ka shtuar se fitorja është një domosdoshmëri.
“Mendoj se i kemi menaxhuar mirë ndeshjet që kemi zhvilluar deri më tani. 6 ndeshje jashtë fushës tënde janë të vështira prandaj duhet ta shijojmë këtë përballje sepse do të luajmë përballë tifozëve tanë dhe duhet t’u tregojmë të gjithë që ne duam të fitojmë dhe duam të tregojmë vlerat në këtë sfidë shumë të rëndësishme”.-theksoi tekniku.
Rikujtojmë se në këtë përballje Vllaznia dhe Dinamo vijnë me pikë të barabarta, nga gjashtë secila dhe fitorja do e kalonte cilëndo prej tyre në vend të dytë të tabelës së Superligës./K.T/Gijotina.com
