Kampionati Kombëtar i Futbollit në Republikën e Maqedonisë së Veriut është, tashmë në fazën më të nxehtë të tij me llogaritë për titullin dhe jo vetëm që fillojnë të qartësohen. Në këtë pikë të sezonit, çdo gabim është fatal, prandaj të gjitha skuadrat që luftojnë për titull duhet të bëjnë sa më pak gabime.
Fitojnë Struga dhe Shkupi, ndërkohë që Shkëndija u ndal nga Sileks Kratovo në një barazim 0-0. Skuadra e Shpëtim Duros mposhti 2-0 Tikves dhe tani kryeson kampionatin me 5 pikë mbi Shkëndijën.
Autogoli i portierit Martin Davkov, i dhuroi Strugës avantazhin në pjesën e parë. Në fraksionin e dytë të takimit erdhi edhe goli i qetësisë nga Bunjamin Shabani.
Struga është ngjitur në kuotën e 56 pikëve dhe vijon të marshojë drejt titullit të parë në histori.
Ndërkohë, Shkupi rigjeti fitoren. Kampionët në fuqi triumfuan 3-0 përballë Bregalnica Stip falë golave të Sunday Adetunji (2x) dhe Freddy Alvarez.
Bardhekaltrit nga kryeqyteti renditen në vendin e tretë me 49 pikë.
Discussion about this post