Kanë përfunduar dy takimet e para të javës së pestë të Superligës shqiptare. Kastrioti siguroi fitoren e parë për këtë sezon futbollistik, teksa Egnatia mori tre pikë të tjera falë brazilianit Pedro.
Krutanët mundën Skënderbeun në shtëpi me rezultatin 2-0, duke u ngritur kështu në pozicionin e shtatë në tabelën e Superiores me katër pikë, teksa korçarët zbresin në vendin e nëntë me tre pikë.
Pjesa e parë e kësaj ndeshje u mbyll në paqe dhe do të duhej minuta e 65-ë që të vinte goli i parë dhe i avantazhit për Kastriotin përmes Bashës. Rezultati u dyfishua vetëm në minutën e 84 të lojës, duke bërë që kjo sfidë të përfundonte me shifrat 2-0.
Laçi nga ana tjetër vazhdon pikiatën, teksa sot u mund Egnatia me shifrat 0-1 në shtëpi. Duket se kurbinasit e kanë humbur shkëlqimin këtë sezon dhe nuk po marrin asnjë fitore. Aktualisht renditen në vend të fundit të tabelës me vetëm dy pikë, teksa Egnatia ka kaluar në pozicionin e dytë me tetë pikë.
Skuadra e Rrogozhinës ka siguruar të marrë tre pikë të tjera sërish falë brazilianit Pedro, i cili ka shënuar të vetmin gol të këtij takimi në minutën e 75-ë.
Teksa në dy ditët në vijim do të zhvillohen edhe tre takimet e mbetura për raundin e pestë, të dielën luajnë Partizani-Kukësi dhe Teuta-Tirana, ndërsa të hënën Vllaznia do të përballet me Dinamon./K.T/Gijotina.com
