Superliga/ Tirana dhe Kukësi, në ‘luftë’ për kreun, ndeshjet e ditës

Ditën e sotme do të zhvillohen tre takimet e mbetura të javës së 11 të Superligës shqiptare.

Në orën 13:45 janë planifikuar të zhvillohen dy takime Egnatia-Tirana dhe Kastrioti-Kukësi, ndërsa në orën 16:45 do të përballen Partizani-Skënderbeu.

Në çiftin e parë kemi dy skuadra që vijnë nga mungesa e rezultateve, ekipi i Rrogozhinës që tashmë nuk do të jetë më nën drejtimin e trajnerit Gugash Magani, i cili u shkarkua para disa ditësh do të kërkojë kthesën për t’u rikthyer në pozita të mira në renditje.

Ndërsa Tirana e vendit të parë nga ana tjetër është me një diferencë të vogël në pikë me Kukësin me vetëm 1 më shumë dhe do të tentojë që t’i rikthehet fitoreve që në ndeshjet e fundit i kanë munguar.

Te Kastrioti-Kukësi kemi krutanët që renditen të fundit me vetëm 5 pikë të grumbulluara deri më tani dhe që pritet që të bëjnë gjithçka për t’i shpëtuar rrezikut, të cilët përballë do kenë ‘Verilindorët’ që në këtë përballje vijnë shumë të fortë dhe që kërkojnë të marrin kreun e Superligës.

Ndërsa ndeshja Partizani-Skënderbeu pritet të jetë akoma me interesante, me dyshen që janë rivalë të vjetër. ‘Të Kuqtë’ e kryeqytetit duket se kanë bërë kthesë në rezultate pas disa javësh mungese të fitoreve, teksa edhe korçarët duket se po e marrin veten dhe do të kërkojnë që edhe nga kjo përballje të dalin me pikë.

Rikujtojmë se të premten u zhvilluan dy takimet e para ku Laçi shkatërroi me rezultatin 5-0 Dinamon, ndërsa Teuta-Vllaznia u ndanë në paqe me barazimin 1-1./K.T/Gijotina.com