Ditën e shtunë në orën 16:45 Kukësi do të presë Teutën në ‘Elbasan Arena’ në atë që shihet si një nga sfidat më interesante të javës së katërt të Abissnet Superiore.
Duke folur në prag të kësaj ndeshje, trajneri i ‘Verilindorëve’, italiani Diego Longo ka kaluar në delir duke thënë se me skuadrën që ka ai mund të fitojë edhe ndaj Interit.
“Ne do karikohemi që të jemi gati për Teutën dhe presim tri pikët. Me sakrificë, organizim dhe besim, mund të mundim jo vetëm Teutën, Laçin, Egnatian po edhe Interin. Me Teutën do jetë një ndeshje e bukur dhe jam kurioz të shoh skuadrën. Na mungon Lulaj por është rikthyer Kristi Marku dhe jam i lumtur për këtë pjesë. Teuta është kampione dhe ne vjet ishim të gjashtët, sigurisht që ata janë favoritë”,- u shpreh ai.
Aktualisht Kukësi kryeson Superligën me 7 pikë, ndërsa kampionët në fuqi të Shqipërisë renditen në vendin e dytë me 5 pikë.
Rikujtojmë që në pesë ndeshjet e fundit të zhvilluara midis tyre, 3 janë fituar nga ‘Djemtë e detit’, ndërsa 2 të tjerat janë mbyllur me barazim./K.T/Gijotina.com
