Kreu i Partisë Demokratike, Sali Berisha theksoi në konferencën e sotme për mediat se Edi Rama nuk po mbron Mirlinda Karçanaj, e cila u largua nga drejtimi i AKSHI-t pas vënies nën akuzë nga SPAK, por bashkëshorten e tij.
Sipas Berishës, Karçanaj ka vepruar me urdhra dhe porosi të bashkëshortes së kryeministrit. Ai tha se Karçanaj i ka dhënë tendera baxhanakut të Ramës Armand Frangu, të cilin theksoi se e ka denoncuar disa herë.
“Mbrojti Linda Ramën. Edi Rama mbrojti atë që e quan gjysma e tij më e mirë, se Mirlinda ka zbatuar çdo urdhër e porosi të Lindës së Surrelit dhe këtë e ka marrë vesh çdo njeri. Nga viti 2015 gjer sot, famozin Armand Frangu e kam denoncuar me dhjetëra herë. Frangu është baxhanaku i Ramës dhe kunati i Lindës. Ka marrë me procedura sekrete qindra tendera nga Mirlinda që do të dalë si kristali.”, u shpreh Berisha.
Më tej, ai shtoi se kryeministri duhet të pranojë komisionin hetimor parlamentar për këtë dosje, në të cilën tha se janë të përfshira dëshmitë e Geron Meçes, dhe që sipas tij, “fundosin jo vetëm Lindën e AKSHI por edhe Lindën e Surrelit”.
Sipas Berishës, mbrojtja që po bën kryeministri është një “dëshmi e implikimit të tij familjar në aferën e AKSHI-t.”
“I bëj thirrje Ramës të pranojë krijimin e komisionit hetimor parlamentar ku të paraqitet dosja në të cilën dëshmitë e Geron Meçes fundosin jo vetëm Lindën e AKSHI por edhe Lindën e Surrelit. Në parimin që hajduti nuk ngopet kurrë, kërkon të privatizojë tenderat e AKSHI-t, që t’i kontrollojë përsëri prandaj edhe mbrojtja që i bën Mirlindës është mbrojtje që i bën Lindës së Surrelit dhe dëshmi e implikimit të tij familjar në aferën e AKSHI-t. “, u shpreh Berisha.
Discussion about this post