Sylvinho pajiset me pasaportë shqiptare: Jam puro!

Trajneri i kombëtares shqiptare, braziliani Sylvinho është qytetari i ri i Republikës së Shqipërisë.

Sylvinho është pajisur me pasaportën shqiptare. Lajmin e ka bërë të ditur ministri i Brendshëm, Taulant Balla, gjatë Samitit të Diasporës që po zhvillohet në Pallatin e Kongreseve.

“Jemi këtu në Samitin e Diasporës shqiptare. Kam pranë shqiptarin e fundit që ka pranuar të jetë qytetari ynë”, tha Balla.

Më pas, Sylvinho shprehet “sigurisht, shqiptar puro. Shumë faleminderit”.

Nuk mungojnë as batutat me kreun e Qeverisë, Edi Rama, ku ky i fundit i drejktohet “është fakt i kryer. Nuk ke zgjedhje tjetër”.

Sylvinho mori drejtimin e kombëtares shqiptare rreth 10 muaj më parë, ndërsa vuri si objektiv kualifikimin e Shqipërisë në Euro2024. E ndërsa arriti këtë objektiv, tekniku brazilian dhe të përzgjedhurit e tij në kombëtaren kuqezi përmbushën edhe një tjetër objektiv: vendin e parë në Grupin E, duke lënë pas Republikën Çeke.