Deputeti i Lidhjes Demokratike të Kosovës (LDK) dhe njëkohësisht ish-kryeministri kosovar, Avdullah Hoti, ka treguar ambiciet e tij për të udhëhequr këtë lëvizje politike.
Ai të mërkurën ka deklaruar se është duke e menduar mundësinë për të garuar për kreun e partisë.
“Jam duke u menduar. Nuk kam vendosur të garoj ende, por nuk kam vendosur as të mos garoj. Ende jam duke e menduar”, është shprehur deputeti në T7, teksa është pyetur nëse ka ambicie për të garuar për kryetar të LDK-së.
“Nuk e kam vendosur ende, sepse nuk mund ta vendos pa u kryer zgjedhjet në degë, e mandej të caktohet Kuvendi”, ka thënë tutje ai.
Hoti është pyetur edhe për raportet me Abdixhikun dhe nëse e mbështet atë për kryetar të partisë.
Ai ka mohuar se ka hatërmbetje mes tyre, ndërsa ka shtuar se debati i brendshëm në LDK lë për të dëshiruar.
“Nuk do e kisha interpretuar me hatërmbetje. Ai e ka punën e tij dhe e ka për detyrë që të menaxhojë partinë, politikat e brendshme të partisë dhe të grupit parlamentar, të arrijë harmonizimet e brendshme në vendimmarrjen e partisë, e cila gjë mund të them se lë për të dëshiruar. Pra, debate i brendshëm që duhet të kemi në mënyrë që të vijmë deri te qëndrimet që mbajmë si grup parlamentar”.
Deputeti Hoti ka përmendur më tej bagazhin e tij shumëvjeçar që ka nëpër institucionet e vendit.
“Nuk mund të flas për veten, por besoj që jam ndër deputetet më të zëshëm, në përputhje me orientimet që i ka LDK-ja…Jam person që kam pasur funksione në të gjitha pozitat”, ka thënë ai.
Gjithsesi sa i përket çështjes për paraqitjen e kandidaturës për kryetar të partisë, Hoti ka deklaruar se “është obligim i secilit anëtar ta respektojë statutin e LDK-së”.
Discussion about this post