Administratorja e inceneratorit të Tiranës, Ariola Kodra nuk është paraqitur në komisionin për Incenaratorët, pavarësisht kërkesës së komisionit për tu rimarrë në pyetje.
Jorida Tabaku tha se Kodrës i janë dërguar njoftimet, por ajo nuk është paraqitur. Tabaku u shpreh se posta e Kuvendit ka shkuar te inceneratori i Tiranës, por roja i objektit ka thënë se nuk ka asnjë punonjës në objekt.
Deputetja demokrate shtoi se kishin tentuar ta njoftojnë edhe përmes telefonit administratoren, por nuk ishte përgjigjur, ndërsa më herët u shpreh se nëse është e nevojshme do të merret me polici.
“Diskutuam sot në mëngjes për praninë e znj.Ariola Kodra. E pritëm në mëngjes, nuk erdhi. E ftuam në orën 15:00. Stafi i Kuvendit dhe posta e posaçme e Kuvendit shkuan në inceneratorin e Tiranës i cili është i mbyllur. Punonjësi ka mbyllur derën dhe tha që nuk ndodhen asnjë nga stafi i inceneratorit i pranishëm në kantier. I kemi nisur një kërkesë tjetër me postën speciale znj.Ariola Kodra. E kemi marrë disa herë në telefon. Do ta ripërsërisim kërkesën tonë që ajo të jetë këtu pjesë. Ndërkohë që na ka sjellë një pjesë të informacionit që kërkuam ditën e premte. I bëjmë thirrje znj.Ariola Kodra, punonjësve të inceneratorit të Tiranës të hapin derën, të pranojnë shkresën e Kuvendit, janë letra zyrtare të shtetit shqiptar”, tha Tabaku.
Discussion about this post