Deputetja e zgjedhur e PD, Jorida Tabaku këmbëngul se politikat e qeverisë Rama po sjellin zhdukjen e shtresës së mesme në Shqipëri.
“Arsyet që kanë çuar në këtë situatë janë pashmangshmërisht të lidhura me politikat ekonomike dhe fiskale të qeverisë Rama. Vendosja e politikave fiskale si taksa progresive deri me 23% dhe që ka shkatërruar sistemin e tatimit mbi të ardhurat personale si dhe vendosja e taksave abuzive në kundërshti me çdo logjikë fiskale kanë ndikuar negativisht. Për rrjedhojë shtresa e mesme taksohet më shumë se sa pjesa tjetër e popullsisë dhe kjo prodhon pamundësinë për t’u ngjitur në shkallën e mirëqënies.”
Tabaku thotë se kjo shtresë taksohet më shumë nga çdo tjetër dhe nuk ka mundësi për t’u rritur ekonomikisht.
Më tej ajo shprehet se kjo situatë e keqe do të rritet pasi vendi po përballet me inflacion të importuar nga kriza e pandemisë dhe qeveria s’ka më asnjë plan për ta përballuar.
“Mirëpo e keqja duket se do të rritet, pa dashur të jem pesimiste. Vendi po përballet me një inflacion të importuar nga kriza e pandemisë, qeveria nuk ka një plan të qartë dhe të koordinuar se çfarë do të ndodhë me post-krizën. Këtyre duhet t’i shtojmë edhe situatën me borxhin publik që duket se ka prekur 100% të PBB-së, kontratat me PPP janë gjithashtu një barrë për buxhetin. Pra, buxheti nuk ka më para për t’ia hedhur ekonomisë, qytetarët shihen si një lopë për t’u mjelë.”
Sipas saj, zgjidhja është ndryshimi i politikës fiskale ku biznesi të jetë në fokus të sistemit tatimorm por që për Tabakun nuk mund ta bëjë qeveria Rama 3.
“Zgjidhja në këto kushte është ndryshimi total i logjikës së politikës fiskale dhe mënyrës se si i qasemi qytetarëve. Ky i fundit duhet të jetë në piedestal të sistemit tatimor. Biznesi duhet të jetë në fokus të sistemit tatimor.
Jam e sigurtë që kjo nuk vjen dot nga kjo qeveri, sikundër e sigurtë që forcimi i shtresës së mesme, profesionisteve, dhe vleresimi i punës nuk vjen dot nga keto njerëz që drejtojnë në humnerë vendin prej 8 vitesh!”- u shpreh Jorida Tabaku në Facebook.
