Komisioni i Ekonomisë u shoqërua me një sërë debatesh mes ministres së Financave, Delina Ibrahimaj dhe deputetes së PD Jorida Tabaku. Tabaku akuzoi në komision MFE se po fsheh vlerën vërtet të borxhit dhe shkeljet me PPP, por asnjë përgjigje nuk mori mbrapsht. Këtë qëndrim jo të rregullt të Ibrahimajt, Tabaku e ka evidentuat sërish përmes një postimi në Facebook, ku shkruan se ministrja e Financave u soll në mënyrë shumë arrogante me opozitën në komision për shkak se u zu ngushtë nga pyetjet e drejtpërdrejta të tyre.
Sipas Tabakut, Ibrahimaj heshti në komision për shkak se po i bëhej e vështirë situata dhe nuk mbulonte dot më vjedhjet e qeverisë. “Sot, ministria e Financave dhe Ekonomisë, me një gjest arrogance u largua nga Komisioni i Ekonomisë gjatë paradites duke mos iu përgjigjur pyetjeve të ngritura nga deputetët. Gjeti një shkak të parëndësishëm dhe u largua duke mos respektuar institucionin e parlamentit dhe komisionet. Nuk dua ta mbroj këtë akt por e kuptoj qartë veprimin e saj, nuk ka pasur guximin që t’i përgjigjet paradite pyetjeve dhe debatit të kolegëve. Përpos kësaj qeveria hesht kur flitet për borxhin publik pasi nuk ka materializuar në borxh as 250 mln euro borxhe që kemi marrë nga konferenca e donatorëve”, shkruan ajo.
Sipas Tabakut, Ibrahimaj u zu ngushtë në komision për shkak se nuk mund të tregonte arsyet korruptive pse nuk ka reflektuar në buxhetin e vitit 2022 krizën në të cilën lundron ende vendi. Tabaku thotë se, ministrja duhej të tregonte pse për vitin që vjen investimet tkurren me 10%. Në përfundim, ajo akuzon MFE-në se do të rrisë edhe më tej kontratat koncesionare dhe PPP edhe megjithëse ato kanë risqet e larta këto të fundit nuk pasqyrohen në buxhetin e shtetit.
Discussion about this post