Pas reagimit të kreut të PD, Lulzim Basha për arrestimin e ish-ministrit të LSI, Lefter Kokës, një tjetër reagim ka ardhur nga selia blu.
Nënkryetarja e PD, Jorida Tabaku tha se denoncimi për inceneratorët është bërë që në 2017-ën, dhe se deri më tani, janë në fazën e mbledhjes së informacioneve e në dy javët në vijim do të nisin me planin tjetër të veprimit. Një tjetër betejë e rëndësishme e PD sipas Tabakut është dhe Komisioni Hetimor për zgjedhjet e 25 prillit.
“PD e denoncoi për herë të parë aferën e inceneratorëve në nëntor të vitit 2017 pasi kishim analizuar dokumentacionin për inceneratorët e Elbasanit dhe Fierit. Atëherë bëra një interpelancë me ministrin Damian Gjiknuri, por ajo përfshinte edhe ministrinë e Mjedisit dhe tre bashkitë përkatëse. Ne e kemi denoncuar këtë aferë çdo ditë. Ne kemi bërë debate parlamentare për të ngritur komisionin hetimor, e kur e ngritëm kishte një rezistencë të madhe për të dhënë të dhëna. Janë dhënë pa procedura dhe në shkelje të ligjit dhe me kosto të fyera. Kostot janë të panumërta. Ne kemi mbyllur fazën e parë të punës së mbledhjes së informacioneve dhe luftën më të madhe e kemi pasur për të mos na dhënë informacionin. E kemi mbyllur këtë fazë dhe në 2 javët në vijim do të nisim me planin tjetër të veprimit”, tha Tabaku.
Ish-ministri i LSI u arrestua nga SPAK pasi akuzohet për shpërdorim detyre, pastrim parash dhe korrupsion. Koka është arrestuar në banesën e tij në Durrës, rreth orës 11:30.
Discussion about this post