Deputetja demokrate, Jorida Tabaku, ka reaguar pas bllokimit të mandarinave shqiptare, të cilat nuk hynë në tregun e Bashkimit Europian, për shkak se kishin përmbajtjeje pesticidesh mbi normat e lejuara.
Sipas Tabakut kjo është një njollë jo vetëm për eksportet, por edhe për sigurinë ushqimore në vend.
Tabaku e konsideroi këtë situatë si pasojë direkte të korrupsionit dhe paaftësisë në menaxhimin e fondeve shtetërore.
“Korrupsioni është pesticidi më i rrezikshëm i ekonomisë shqiptare,” deklaroi ajo, duke nënvizuar se përparimi i bujqësisë duhet të jetë prioritet kombëtar për të mbështetur mbi 300 mijë familje shqiptare që jetojnë nga ky sektor.
Deklarata :
Mandarina, një nga frutat më të dashur për shqiptarët në fund të vitit, po bllokohet përsëri në pikat kufitare kur tentohet eksporti i saj. Arsyeja? Përdorimi i pesticideve të ndaluara, larg standardeve dhe normave të Bashkimit Evropian. Kjo ka dëmtuar cilësinë e produktit dhe ka mbyllur derën për eksportet shqiptare.
Ky problem është një njollë e keqe jo vetëm për eksportet, por edhe për sigurinë ushqimore në vend. Ajo që i hidhet këtyre produkteve, nga fusha deri në tryezën e shqiptarëve, nuk kontrollohet siç duhet. Për më tepër, buxheti për sigurinë ushqimore është ulur me 145 milionë lekë vetëm vitin e kaluar.
Kjo situatë është pasojë e politikave të dështuara të qeverisë, si skema e TVSH-së që po falimenton sektorin, dhe mungesa e fondeve IPARD që duhej të ndihmonin bujqësinë. Problemet grumbullohen njëri pas tjetrit, duke bërë që produktet shqiptare të mos jenë konkurruese në tregjet evropiane.
Zgjidhja ekziston dhe është e qartë: ky sektor duhet të bëhet prioritet për ato 300 mijë familje që mbështeten në bujqësi. Shqipëria ka potencialin të jetë një lider në tregjet evropiane, por kjo kërkon angazhim dhe mbështetje reale.
Discussion about this post