Deputetja e Partisë Demokratike, njëherësh kryetare e Komisionit për Çështjet Europiane, tha se Shqipëria nuk ka një avancim real në procesin e integrimit në Bashkimin Europian.
Në një dalje për mediet nga kryesia e Kuvendit, Tabaku tha se “marrja e vendimit për hapjen e negociatave dhe pozicionet negociuese, por njëkohësisht dhe diskutimet që po kryhen për të gjithë grup-kapitujt, vijnë si rezultat i vendimit gjeopolitik që është marrë për hapjen e negociatave”.
Tabaku tha se “Partia Demokratike e ka nisur këtë proces, e mbështet këtë proces dhe do të jetë ajo që do ta përfundojë këtë proces në qeverisje”.
Deputetja e PD-së nënvizoi se “nuk ka ndonjë kriter të plotësuar, nuk ka një avancim real, edhe në çështje të tregut të brendshëm, por është një proces teknik i cili po vijon si rezultat i vendimit gjeostrategjik që është marrë mbas agresionit rus në Ukrainë, të paktën tre vite më parë”.
“Në pjesën më të madhe të të gjithë iniciativave që qeveria shqiptare ka shprehur, fundi i realizmit të tyre është vitit 2027”, tha Tabaku.
Sipas Tabakut kjo tregon një mungesë serioziteti, ka një boshllëk shumë të madh sa i takon përfarimit të legjislacionit për tregun dhe se kjo ka krijuar pasiguri tek biznesi.
“Për tregun e brendshëm të shërbimeve janë 300 akte ligjore, 38 sektorë, 500 aktivitete shërbimi që janë 100 ligje në vetvete dhe ata thonë se do t’i bëjnë të gjitha në vitin 2027. Ndërkohë që kjo ndodh, vazhdojnë dhe miratojnë akte ligjore që bien në kundërshtim me këtë. Të gjithë jemi koshientë që për ligjin e Prokurimeve Publike ka përjashtime për sektorët strategjikë, që është në kundërshtim me direktivat e BE, ka përjashtime sa i takon TVSH-së së hoteleve, të cilën ne në vijimësi e kemi ngritur si shqetësim”, tha Tabaku.
Deputetja e PD-së tha se “kjo tregon një mospërputhje të qartë të vizionit që ka qeveria dhe të mungesës së vizonit politik me faktin që miraton vendime që nuk janë në përputhje me detyrimet që është duke marrë në procesin e integrimit”.
Tabaku shtoi më tej se “elementi i dytë lidhet me implikimet që ka për buxhetin. Nuk ka sot një analizë sa i takon buxhetit, cilat tarifa do të rriten? Cilat do të ulen? A ka një analizë të impaktit të buxhetit, të impaktit në sektorin privat? Asgjë e tillë nuk ka ndodhur”.
“Kjo për t’ju treguar me dy elementë kryesore se ky është një proces i cili nga ana e qeverisë në pjesën më të madhe të detyrimeve janë shtyrë të gjitha në vitin 2027 për t’u realizuar dhe nga ana tjetër në pjesën më të madhe të sektorëve të cilat ne i kemi identifikuar dhe kemi bërë propozime konkrete, duke nisur me tregun e brendshëm, masat që duhet të marrë çdo qeveri për t’u përfaruar me BE-në, rregulli i tepërt, gatishmëria e biznesit, heqja e lejeve dhe licencave dhe duke përfunduar me pastrimin e parave, që janë pesë fushat kryesore, qeveria shqiptare nuk i ka plotësuar detyrimet. Kur nuk i ka plotësuar për 10 vite, s’ka për t’i plotësuar për 2 vite”, tha Tabaku.
Discussion about this post