Deputetja e Partisë Demokratike, Jorida Tabaku u ka bërë thirrje qytetarëve t’i bashkohen protestës, duke e cilësuar pjesëmarrjen masive si një përgjigje ndaj një sistemi që, sipas saj, ushqehet nga frika, përqendrimi i pushtetit dhe interesat e një pakice.
Përmes një videoje të publikuar në rrjetet sociale, Tabaku ngriti shqetësimin për mënyrën se si, sipas saj, janë trajtuar protestuesit gjatë dhjetë ditëve të fundit. Ajo pretendoi se qytetarët që kanë dalë në rrugët dhe sheshet e Tiranës për të shprehur kundërshtimin e tyre janë përballur me dhunë, kërcënime, arrestime dhe shpifje.
“Për 10 ditë me radhë, protestuesit janë rrahur, janë sulmuar, janë kërcënuar, janë arrestuar dhe është shpifur ndaj tyre”, u shpreh ajo.
Deputetja demokrate akuzoi kryeministrin Edi Rama se po nxit përçarjen mes shqiptarëve. Në deklaratën e saj, Tabaku përmendi edhe sulmet ndaj gjyqtarëve dhe prokurorëve për vendime që, sipas saj, nuk përputhen me interesat e kryeministrit, si dhe ndaj të rinjve, studentëve, pedagogëve dhe mësuesve që marrin pjesë në protestë ose e mbështesin atë.
Sipas Tabakut, protesta përfaqëson kërkesën e shumicës së shqiptarëve për ndryshim, ndërsa qytetarët duhet ta bëjnë këtë kërkesë edhe më të dukshme përmes pjesëmarrjes në shesh. Ajo argumentoi se përballë një pakice që, sipas saj, mban në këmbë pushtetin aktual, përgjigjja duhet të jetë mobilizimi qytetar.
“Ky sistem do të rrëzohet nga protesta e lirë e njerëzve”, deklaroi Tabaku, duke e lidhur reagimin qytetar me synimin për një Shqipëri ndryshe dhe europiane.
Në fund të mesazhit të saj, deputetja e Partisë Demokratike u bëri thirrje qytetarëve të bashkohen në protestë për të mbrojtur zërin e të rinjve dhe për të kundërshtuar atë që ajo e cilësoi si klimë përçarjeje, kërcënimesh dhe arrestimesh.
“Për të mbrojtur atë që sot i ka mbetur Shqipërisë: zërin e fortë të rinisë. Në protestë!”, përfundoi Tabaku.
Discussion about this post