Portieri Angelo Tafas është ndër të paktët që arriti t’i mbijetojë “furtunës” së largimeve te Kukësi. Kjo, jo vetëm për faktin se ka ende kontratë me këtë klub, pasi edhe me një pjesë të tyre u ndërpre bashkëpunimi me konsensus, por shihet si një futbollist bazë nga ana e drejtuesve për të nisur një cikël të ri.
Ka qenë vetë 23-vjeçari që konfirmon për “Panorama Sport” se do të respektojë kontratën me klubin dhe në bisedat që ka pasur me drejtuesit, ka besim se do të krijohet një ekip pretendent.
“Unë jam ende në kontratë me Kukësin dhe do të vazhdoj të jap kontributin tim në këtë skuadër. Kam biseduar me drejtuesit dhe më kanë thënë që do të ndërtohet një ekip i ri, me lojtarë që kanë ambicie dhe dëshirë për të arritur suksesin”, u shpreh fillimisht portieri i verilindorëve, i cili bëhet gati të nisë sezonin e tij të katërt në radhët e Kukësit.
SITUATA- Tafas flet pak edhe për situatën në skuadër, e cila nuk ka qenë pozitive, sidomos këtë sezonin e fundit, ku rrezikoi madje edhe mbijetesën. Mesa duket, largimet e shumta kanë lidhje me këtë fakt, ndonëse sipas portierit, nuk i bëjnë mirë ekipit.
“Në fakt, tri vitet e fundit që nuk janë arritur objektivat, ka pasur shumë largime nga skuadra dhe kanë ardhur po aq shumë lojtarë të rinj. Kjo, normalisht nuk është e mirë, sepse ekipi duhet të ketë një bazë lojtarësh”, vijoi më tej portieri i Kukësit, i cili pranon se largimet dhe lëvizjet e shpeshta përgjatë këtyre viteve tek ekipi, kanë dhënë efektin e vet negativ në fushë, në mosarritjen edhe të rezultateve. Sa i përket nisjes së përgatitjeve, Tafas konfirmoi se dje për shkak të një shqetësimi familjar, nuk ishte i pranishëm, por do të bashkohet më vonë me grupin.
“Nuk isha në stërvitje për shkak të një problemi familjar. Por, do t’i bashkohem pak më vonë ekipit, me shumë gjasa në fillim të korrikut”, mbylli prononcimin e tij për gazetën portieri i skuadrës së Kukësit, Angelo Tafas. Përpos tij, në kontratë me Kukësin janë edhe mbrojtësi Franko Lamçe, mesfushori Abdou Mbarak dhe sulmuesi Atdhe Rashiti. Me shumë gjasa, nga kjo katërshe ndoshta do të ringrihet edhe Kukësi i sezonit të ri./PanoramaSport
Discussion about this post