Ish-kryenegociatorja e Kosovës në dialogun me Serbinë, Edita Tahiri takimet mes kryeministrit të Kosovës, Albin Kurti dhe Aleksandar Soros, djali i George Sorosit, i ka cilësuar si lojëra të rrezikshme.
Në këtë që ajo e cilëson lojë, ka shigjetuar dhe kryeministrin e shqiptarëve Edi Rama, i cili sot dhe nesër është prezent në Beograd, në takime për nismën “Open Balkan”, nismë të cilës për shkak të të shkuarës politike Kosova nuk iu bashkua kurrë.
Më tej, Tahiri kërkon që Rama të ndalohet teksa shprehet se djali i Sorosit duhet të shpallet “non grata”, pasi sipas saj ai ka punuar hapur për shkëmbimin e territoreve mes Serbisë dhe Kosovës.
“Edi Rama ne Beograd, djali i Sorosit pardje ne Prishtine….Lojera te rrezikshme. A ka kush ta ndal Ramen dhe a ka kush ta shpall ‘persona non grata’ djalin e Sorosit qe hapur punoi per ‘shkembimin e territoreve’”, shkroi Tahiri në Facebook.
Të martën Aleksandër Soros u prit në zyrën e kryeministrisë së Kosovës nga Albin Kurti, ku u tha se objekti i këtij takimi ishin diskutimet për rëndësinë e bashkëpunimit rajonal dhe synimin e përbashkët të rajonit për integrim në Bashkimin Evropian.”
Paralelisht nismës “Open Balkan” sipas kryeministres së Serbisë, Ana Brnabiç, pritet t’i bashkohet dhe Mali i Zi.
Ky lajm vjen pas diskutimeve në lidhje me të ardhmen e kësaj nisme, pas dorëheqjes së aleatit nga Maqedonia e Veriut, Zoran Zaev si kryeministër, por situata u qartësua duke u bërë publik fakti se Zaev do të zëvendësohej nga zv.kryeministri, Nikolla Dimitrov.
Kryeministri shqiptar Edi Rama, presidenti i Serbisë, Aleksandër Vuçiç dhe kryeministri i Maqedonisë së Veriut, Zoran Zaev, në 29 korrikun e kaluar, nënshkruan një deklaratë të përbashkët, e cila bazohet në 4 liritë e mëdha të bashkëpunimit në botën perëndimore: liria lëvizjes së mallrave, kapitalit, njerëzve dhe shërbimeve.
Discussion about this post