Presidenti i Skënderbeut, Ardjan Takaj, është dakord me vendimin që ka marrë FSHF-ja për ndryshimin e formatit të Superiores për sezonin 2023-2024. Ai jep edhe një argument pse një format i tillë i bën mirë kampionatit dhe shton të ardhurat për klubet.
“Tani dihet që ne kemi mbetur pa një ligj për sportin dhe Superliga do të mundohet të prodhojë sa më shumë të ardhura, në mënyrë që gara të bëhet sa më interesante. Normalisht në këtë ndryshim që është bërë, interesi i klubeve të kryeqytetit është më i madh, pasi do të luajnë tri ndeshje në shtëpinë e tyre. Që të jem i sinqertë, në pamje të parë kjo skemë duket sikur ka një dëm për atë që bën një superkampionat dhe shkëputet me pikë në krye.
Megjithatë, sërish e bën më interesant fundin e kampionatit, pasi bëhet shumë i zjarrtë dhe merr më tepër vëmendje nga tifozëritë. Shpallja kampion në sekondën e fundit është shumë herë më intriguese. Për publikun besoj është më e bukur, ndërsa disfavori i vetëm është kur vendi i parë bën një shkëputje të madhe. Ky është i vetmi risk, por mesa di FSHF-ja i ka vendosur premion e kampionatit ekipit që e mbyll i pari në krye. E drejta TV-së këtu nuk është ndonjë buxhet i mirë për klubet, kështu që Superiorja duhet të prodhojë të ardhura të tjera”, ka thënë Takaj
Discussion about this post