Ish-deputeti Ervin Salianji po vijon me turin e tij të Foltoreve me anëtarë dhe simpatizantë të Partisë Demokratike, që janë të zhgënyer e të lodhur nga përdorimi që Sali Berisha po u bën atyre si mburojë për interesat personale të tij dhe të familjes.
Këtë të mërkurë, Salianji po zhvillon takim me struktura të PD-së në Berat, ku fjalën e tij e nisi me sulme ndaj qeverisë, duke e akuzuar si shkaktare të shpopullimit të Shqipërisë.
“Duket sikur të gjithë qytetarët janë lënë vetëm përballë padrejtësisë si jetimë. Këtë ndjejmë të gjithë, një ndjenjë e thellë braktisjeje që ka kapluar Shqipërinë. Këtyre që po qeverisin nuk u vjen turp”, – tha Ervin Salianji.
Sipas Salianjit, gjatë takimeve të zhvilluara në qytete të ndryshme të vendit, ndihet një ndjenjë e thellë braktisjeje dhe zhgënjimi nga politika.
“Është e vështirë të flasësh për vlera e sakrifica, sepse duket sikur shoqëria është futur në një kafaz. Sot jemi mbledhur jo vetëm për të folur për politikën, por për fatin e Shqipërisë. Për vendin tonë të bekuar, që sot është më i lodhur se kurrë, ku shpresa është më e rrallë se zhgënjimi dhe ku të rinjtë pyesin kur është momenti të largohen”, tha ai.
Salianji e cilësoi largimin e të rinjve si “tragjedinë më të madhe” që, sipas tij, po prodhon qeverisja aktuale.
“Kur rinia ikën, gjithçka fiket. Kjo nuk është Shqipëria që meritojnë shqiptarët. Një vend ku ekonomia kontrollohet nga 2-3 duar dhe ku politikanët nuk kanë as përgjegjësi dhe as dashurinë më të vogël për vendin”, deklaroi ai.
Duke kritikuar qeverinë, Salianji tha se qytetarët nuk shprehin asnjë vlerësim pozitiv për të dhe se shteti, sipas tij, ka pësuar një “degjenerim total”.
“Kemi takuar qytetarë që nuk flasin një fjalë të mirë për qeverinë. A mund të thotë dikush një të mirë për qeverinë e Edi Ramës? Qeveria duhet të jetë garanci për ditët e këqija, por këta kanë shkrirë shtetin me krimin”, u shpreh ai.
Në fund, ai ngriti shqetësime edhe për investimet publike, duke përmendur cilësinë e rrugëve dhe përdorimin e fondeve.
“E keni parë si bien rrugët e ndërtuara me miliona euro? Kanë vjedhur edhe hekurin e rrugëve, pa menduar se do bjerë shi apo dëborë”, deklaroi Salianji gjatë takimit me demokratët në Berat.
Në fjalën e tij, Salianji u shpreh se ndryshimet e propozuara në ligj nuk bëhen për të ndihmuar qytetarët me procese të padrejta, por për të krijuar garanci për qeverinë.
“Edi Rama ka propozuar ndryshime në ligj jo për njerëzit me gjyime të padrejta, ai e ndryshon për t’i garantuar vetes dhe ministrave të vetë garanci që të mos preket nga SPAK”, deklaroi Salianji.
Ai theksoi se opozita duhet të jetë e sinqertë me veten dhe qytetarët, duke pranuar se edhe Partia Demokratike ka pasur përgjegjësi në të kaluarën.
“Miq, duhet ta themi të vërtetën deri në fund, edhe ne kemi qenë ndryshe më parë dhe duhet të jemi ndryshe sërish”, u shpreh ai.
Salianji krahasoi situatën aktuale me periudha të mëparshme, kur sipas tij, PD ftonte përfaqësuesit e BE-së, SHBA-ve dhe Britanisë për të diskutuar shqetësimet e opozitës dhe publikut.
“Sot fatkeqësisht në PD as nuk hyn e as nuk del asnjë ambasador. Sepse është e vërtetë si drita e diellit se qeveria dhe gjithë politika janë të kompromentuara dhe korruptuara”, tha ai.
Sipas Salianjit, ndryshimi politik nuk vjen vetëm nga dështimi i qeverisë, por edhe nga aftësia e opozitës për t’u bërë e denjë për ta realizuar atë.
“Ndryshimi nuk vjen vetëm sepse qeveria dështon, por kur opozita bëhet e denjë për ndryshimin. Këtu fillon përgjegjësia jonë dhe e PD-së. Nuk mund të ndryshojë gjë nëse PD nuk ndryshon veten e vet”, u shpreh ai.
gijotina.com/
Discussion about this post