Ka zgjatur plot 4 orë takimi mes ministrit të Brendshëm, Bledi Çuçi, dhe Drejtorit të Përgjithshëm të Policisë së Shtetit, Muhamet Rrumbullaku.
Mësohet nga burime jo zyrtare që si komisariati i Krujës ashtu edhe në Fushë Krujë do të ketë një riorganizim të strukturave të Policisë. Gjithashtu nuk përjashtohet varianti që në mbështetje të forcave lokale policore të angazhohen me shërbime dhe patrullime edhe efektivë të FNSH.
Takimi i zhvilluar në zyrën e Rrumbullakut në Policinë e Shtetit, besohet se ka pasur në qendër të vëmendjes ngjarjet e fundit kriminale në vend, që nisën me vrasjen e dyfishtë në Dukagjin të Shkodrës, vijuan me atentatin me 1 të vrarë dhe dy fëmijë të plagosur në Larushk (Krujë) dhe u përmbyllën me dhunën shtazarake që pjesëtarë të fisit Rraja ushtruan ndaj dy qytetarëve në Borizanë.
Të gjitha ngjarjet e rënda kriminale ndodhën në një hark kohor prej rreth 2 javësh. E ndërsa për dy ngjarjet e para ku u regjistruan viktima dhe të plagosur, Policia e Shtetit ende nuk ka të arrestuar, për dhunën e Rrajave janë në kërkim vëllezërit e deputetit Rrahman Rraja, si dhe djali i këtij të fundit.
Lidhur me takimin Çuçi-Rrumbullaku nuk ka pasur asnjë njoftim zyrtar, ndërsa një ditë më parë ministri i Brendshëm, duke dënuar aktet e dhunës, tha se nuk ka persona mbi ligjin. Pak minuta pas deklaratës së Çuçit, Policia njoftoi se kishte shpallur në kërkim djalin e deputetit.
Discussion about this post