Ish-presidenti Bamir Topi ka dhënë detaje lidhur me takimin me presidentin e zgjedhur Bajram Begajn. Topi tha se takimi ishte miqësor dhe se pa premisa për një presidencë dinjitoze në 5 vitet e ardhshme. Në takim, sipas Topit u diskutua për situatën në rajon, luftën në Ukrainë si dhe për nevojën për forcimin e marrëdhënieve dhe aleancave euro-atlantike.
“Takimi miqësor dhe kortezial. Pashë premisat për një presidencë dinjitoze në këto 5 vite, në funksion të institucionit dhe të integritetit personal. Diskutuam për situatën në rajon, luftën në Ukrainë, nevojën për forcimin e marrëdhënieve dhe aleancave euro-atlantike”, tha Topi.
Takimi zgjati rreth 1 orë e 30 minuta. Mendohet se Presidenti i ri gjithashtu ka marrë këshilla nga paraardhësit e tij për drejtimin e shtetit. Bajram Begaj është zgjedhur si presidenti i nëntë i Republikës së Shqipërisë me 78 vota pro, 4 kundër dhe 1 abstenim më 4 qershor. Ish-shefi i shtabit të Përgjithshëm, emri i të cilit doli nga PS, do të jetë pasardhësi i Ilir Metës dhe të qëndrojë në krye të shtetit për pesë vitet e ardhshme.
Discussion about this post