Kryenegociatori i Kosovës, Besnik Bislimi dhe i Serbisë, Petar Petkoviç do të takohen të premten në Bruksel, me synimin për t’i dhënë zgjidhje çështjes së targave. Në Qeveri kanë thënë se do të diskutohet edhe për energjinë. Njohës të procesit dialogues kanë shprehur pritjen që kryenegociatorët të kthehen me marrëveshje nga Brukseli, pasi kanë konsideruar se për çështjet që do të diskutohet mund të jenë dakorduar paraprakisht në takimin që kryeministri Albin Kurti dhe presidenti i Serbisë, Aleksandar Vuçiç, kanë pasur javën e shkuar në Berlin.
Mbërritja e një marrëveshjeje për targat mes Kosovës dhe Serbisë synohet të arrihet këtë të premte në Bruksel, gjatë një takimi të planifikuar mes delegacioneve të të dyja shteteve. Krahas për targat, në takimin mes kryenegociatorëve të Kosovës dhe Serbisë do të bisedohet edhe për energjinë, kanë konfirmuar në zyrën e zëvendëskryeministrit Besnik Bislimi.
Pas vënies së reciprocitetit në targa, të dyja vendet kanë mbërritur një marrëveshje të përkohshme, e cila parasheh mbulimin me stikers të denominimit dhe simbolit shtetëror që ndodhet në targën e secilit shtet. Marrëveshja parashihte që zgjidhja e përhershme, që nënkuptonte ridizajnim të targave, të mbërrihej brenda gjashtë muajsh. Por, ndonëse kjo periudhë ka kaluar, nuk ka një marrëveshje të firmosur dhe ajo synohet të mbërrihet në takimin e kryenegociatorëve Besnik Bislimit të Kosovës dhe Petar Petkoviqit të Serbisë.
Arbresha Loxha, drejtoreshë ekzekutive e Grupit për Studime Politike e Juridike, ka shprehur pritjen që marrëveshja për targat të arrihet në një afat të shkurtër. Ajo ka shprehur besimin se për arritjen e ujdisë u është bërë presion palëve në Berlin dhe pret që edhe ndonjë marrëveshje tjetër të mbërrihet, krahas asaj për targat.
“Për çka konsideroj që ka hapësirë dhe që mund të shtyhet përpara është në drejtim të marrëveshjes për energji, përtej kësaj për targat dhe gjithashtu marrëveshjes për të pagjeturit. Kjo duket që është duke u shtyrë më shumë edhe nga pala e Kosovës. Marrë parasysh presionin në takimin që ishte në Berlin dhe nevojën për të arritur një marrëveshje për targat mund të jetë e prishmë që marrëveshja për targat të arrihet në një afat të shkurtër”.
Nga ana tjetër, ndonëse jo për takimin e së premtes me dialogun në përgjithësi, është marrë të martën presidenti i Serbisë, Aleksandër Vuçiç. Pas takimit me të dërguarin e Gjermanisë për Ballkanin Perëndimor, Manuel Sarrazin, Vuçiçi ka thënë se dialogu është e vetmja mënyrë drejt zgjidhjes së çështjeve të hapura. Sipas njoftimit të lëshuar nga Zyra e tij, Vuçiçi dhe Sarrazi janë pajtuar që arritja e një marrëveshjeje të qëndrueshme është mënyra e drejtë.
“Duke folur për dialogun ndërmjet Beogradit dhe Prishtinës, bashkëbiseduesit u pajtuan se biseda është mënyra e vetme e drejtë për zgjidhjen e çështjeve të hapura, si dhe për arritjen e një marrëveshjeje të qëndrueshme”, thuhet në këtë njoftim. “Presidenti theksoi se pret mbështetje konstruktive për dialogun dhe gjetjen e një zgjidhjeje kompromisi që do të mundësonte stabilitet të qëndrueshëm në rajon me zbatimin e marrëveshjeve ekzistuese dhe mbi të gjitha formimin e Asociacionit të Komunave Serbe, i cili ka munguar për më shumë se 9 vjet”.
E, në Kosovë nuk janë shprehur pritje për lëvizje domethënëse në kuadër të dialogut të nivelit të lartë.
Drejtoresha e GLSP-së ka thënë se përparimi në proces të dialogut është i mangët.
“Nuk mund të presim ndonjë përparim shumë të madh në proces të dialogut edhe në nivel teknik, por edhe në atë të nivelit të lartë”, ka thënë Loxha.
Megjithëkëtë, sipas saj, takimi i mbajtur në Berlin javën e kaluar do të ndikojë në shpeshtimin e takimeve mes kryeministrit Albin Kurti e presidentit Aleksandër Vuçiç.
“Sa i përket arritjes së një marrëveshjeje ose kornizimit të dialogut me marrëveshje dypalëshe që do të ketë në qendër njohjen reciproke konsideroj se krejt çfarë mund të presim, si nga shtytja që iu bë nga Berlini, por edhe në përgjithësi, është që të dy vendet të qëndrojnë ose mbesin në pozicione të njëjta. Mund të presim intensifikim të takimeve ose të negociatave në nivelin e lartë, por nuk mund të presim diçka konkrete në kornizim të dialogut”.
Afati për arritjen e një marrëveshjeje për targat ka përfunduar më 22 prill, e palët nuk kanë arritur dakordim. Me ndërmjetësimin e emisarit të BE-së, Mirsolav Lajçak, Kosova dhe Serbia janë pajtuar që bisedimet për këtë çështje të vazhdojnë të premten, më 13 maj.
Discussion about this post