Deputeti demokrat Edi Paloka ka reaguar ashpër për takimin e ambasadores amerikane Yuri Kim dhe kreut të grupit parlamentar Enkelejd Alibeaj, të cilin ajo e njeh si kryetar të komanduar të PD.
Paloka e konsideron si turp deklaratën e Kim, ndërsa shton se ambasadorja duhet të respektojë vendimin e Gjykatës për Kuvendin e 11 dhjetorit dhe jo të vendosë mbi të.
“Ky është më tepër se turp, është shkelje e jo vetëm çdo etike por dhe ligjeve të Republikës se Shqipërisë! Kjo zonja që uroi Ramën për “fitoren historike” pa mbaruar akoma procesi zgjedhor më 25 prill; që ka dalë hapur në mbështetje të qeverisë më të korruptuar në rajon ( siç e cilëson vetë Departamenti Amerikan i Shtetit) dhe që prej kohësh është angazhuar në vetë të parë në përcarjen e opozitës shqiptare, sot ka ndërmarrë një akt të fundit, gjithnjë në shërbim të të njëjtit qëllim. Zonja ambasadore, me arrogancë, tregon se jo vetëm nuk respekton Konventën e Vjenës po nuk njeh as vendimet e gjykatave shqiptare megjithëse flet gjithë kohën për drejtësinë. Ti zonjë mund të takosh kë të duash dhe si të duash, po nuk mund të vendosësh mbi gjykatat shqiptare e sidomos mbi vullnetin e lirë të demokratëve shqiptarë”, shkruan Paloka.
Më herët, ambasadorja Yuri Kim postoi një foto nga takimi me Alibeajn, ku bie në sy fakti se ajo i referohet Alibeajt si kryetar i komanduar i PD, duke treguar në mënyrë indirekte se ajo refuzon rikthimin e Berishës dhe Komisionin e Rithemelimit.
Discussion about this post