Takimi i Ramës në Athinë, ministri grek: Nuk e kuptoj vizitën, ishte pa kuptim

Ministri grek Makis Voridis ka komentuar takimin e kryeministrit Rama në Athinë, ditën e djeshme në stadiumin ‘Galatsi’.

Në një intervistë të dhënë mëngjesin e sotëm ai tha se vizita e Ramës në Athinë ishte e panevojshme dhe e pakuptimtë. Ai shton se “nuk e kupton se çfarë donte të tregonte Rama me këtë takim”.

“Nuk e di se çfarë donte të bënte Edi Rama, ishte një fjalim, një vit nga burgu i Belerit, por nuk e di nëse ishte diçka simbolike apo thjesht ndodhi. Vizita ishte e panevojshme, pa asnjë kuptim”, tha ministri.

“Ndoshta qëllimi i tij – edhe pse ai vetë ndoshta e mohon – ishte një lloj përgjigje ndaj vendimit të Demokracisë së Re për të përfshirë në listën e saj për zgjedhjet evropiane emrin e Fredi Belerit”, tha ai duke shtuar “Formulimi i saktë ishte ai i kryeministrit (grek), ‘ një vizitë e padobishme’”.

Në të kundërt ai shtoi se takimi i Ramës do të prodhojë një efekt tjetër, “Nëse prezenca e zotit Rama ndikon në një mënyrë, ajo është në drejtim të votës pozitive pro Belerit”.

Duke iu përgjigjur atyre që kërkonin ndalimin e vizitës së kryeministrit shqiptar, z. Voridis shpjegoi se ndalimi kishte vetëm një justifikim, atë të sigurisë publike. “Do të thotë, Greqia po tregon se ka frikë nga mitingu që u zhvillua”.

Ai theksoi më pas se “Greqia është vendi me GDP-në më të madhe në Ballkanin Perëndimor, vendi me mbrojtjen më të fortë në Ballkanin Perëndimor, vendi më i vjetër në Bashkimin Evropian në Ballkanin Perëndimor. Nëse do ta ndalonim ky ndalim do të më tregonte se Greqia ka diçka për tu frikësuar. Doli se Greqia nuk kishte absolutisht asgjë për t’u frikësuar. Ka mundësi që qëllimi fillestar i Ramës të ketë qenë ndalimi”, tha ai.

“Në fund, e gjithë kjo u hodh poshtë dhe Beleris do të jetë kandidat dhe besoj se do të ketë një mesazh të fortë duke votuar për Demokracinë e Re dhe sigurisht për Belerin. Një mesazh i fortë se si e shohim veten në Greqi dhe si i japim prioritet çështjeve të shtetit të së drejtës. Ndërsa në këtë ka një pyetje reale: ajo e të drejtave të minoritetit grek në Shqipëri”, nënvizoi ai.