Gjatë konferencës për gazetarët, ish-kryeministri Sali Berisha ka komentuar takimin në Bruksel të kryeministrit të Kosovës, Albin Kurti dhe Presidentit të Serbisë, Aleksandër Vuçiç. Berisha u ndal tek deklaratat e Sekretarit të Përgjithshëm të NATO-s, Jens Stoltenberg i cili takoi dy liderët e Ballkanit. Ai tha se NATO dha një mesazh të fortë për kryeministrin Rama dhe Presidentin Vuçiç të cilët po punojnë për projektin e Putinit që kërkon të hapë një konflikt në Ballkan.
“Takimi në Bruksel, sekretari i përgjithshëm i NATO-s, Jens Stoltenberg përsëriti vendosmërinë e NATO-s për të garantuar stabilitetin e Kosovës. Kjo është stabilitet për rajonin dhe më gjerë. Këtu morën një mesazh të fortë dhe të qartë të gjithë ata të cilët punojnë për projektin e Putinit në Ballkan, Aleksandër Vuçiç dhe sivëllau i tij, Edi Rama. Po kështu, sekretari i përgjithshëm i kërkoi palëve që kundërshtitë t’i zgjidhin me dialog, dhe mbështesim këtë qëndrim të Stoltenberg. Një qëndrim që kontribuon në mënyrë cilësore në stabilitetin në rajon. Të nesërmen e takimit me Stoltenberg, Kurti dhe Vuçiç zhvilluan takime me përfaqësuesit e lartë të BE-së, Joseph Borrell dhe Miroslav Lajçak. Në takim, mund të themi se edhe ky ndonëse nuk pati rezultate konkrete për çështjet, ishte pozitiv sepse të dy palët ranë dakord që mos të bëjnë shumë diplomacinë e altoparlantit por të vazhdojnë negociatat dhe bisedimet. Urojmë që të dominojë arsyeja, Beogradi të heqë dorë nga projekti i Putinit për të hapur një konflikt të ri në Ballkan. Të gjitha çfarë kam lexuar, deklarata të paanshme, flasin se çështja e targave dhe e letërnjoftimeve siç e kërkon qeveria e Kosovës, është e parashikuar në marrëveshjet e mëparshme të arritura mes dy palëve në Bruksel. Qeveria kosovare insiston në kryerjen e marrëveshjeve. Dialogu mes palëve është i domosdoshëm për kapërcimin e krizës” – tha Berisha.
Discussion about this post