Qeveria e Republikës së Kosovës mbetet e përkushtuar, aktive dhe konstruktive në procesin e dialogut me Serbinë të ndërmjetësuar nga BE dhe implementimin e Marrëveshjes Bazë të normalizimit të marrëdhënieve dhe Aneksit të Zbatimit.
Një gjë të tillë e ka potencuar zëvendëskryeministri Besnik Bislimi në takimin e sotëm me ambasadorin e SHBA-së në Kosovë, Jeffrey Hovenier, njofton qeveria përmes një komunikate.
Tutje thuhet se ambasadori Hovenier e përgëzoi dhe uroi zëvendëskryeministrin Bislimi mbi finalizimin dhe arritjen e liberalizimit të vizave për Kosovën dhe nënshkrimit zyrtar, duke e cilësuar ditën e djeshme të suksesshme.
Nga ana e tij, zëvendëskryeministri Bislimi e falënderoi ambasadorin dhe theksoi se Qeveria do të nisë një fushatë informimi për qytetarët si dhe do të forcojë mekanizmat koordinues institucionalë e do të bashkëpunojmë dhe me partnerët tanë.
“Shtetet e Bashkuara të Amerikës janë aleati dhe partneri strategjik kryesor i Republikës së Kosovës. Thellimi i marrëdhënieve mes dy shteteve tona është objektiv primar dhe vizita e zëvendëskryeministrit Bislimi me ministrin Murati javën e kaluar në SHBA e riafirmoi synimin për të vazhduar fuqizimin e marrëdhënieve ekonomike dhe shkëmbimeve tregtare mes nesh”, thuhet në komunikatë.
Ndërkohë, i dërguari i posaçëm amerikan për Ballkanin Perëndimor, Gabriel Escobar ka theksuar në një intervistë për Zërin e Amerikës, se pret një propozim nga qeveria e Kosovës për Asociacionin e Komunave me Shumicë Serbe deri më 2 maj, kur liderët e Kosovës dhe Serbisë do të takohen në Bruksel./RTK
Discussion about this post