Hil Curri, Kryebashkiaku i Fushë Arrëzit, duke folur për mediat, pas mbledhjes së zhvilluar në Shkodër mes kryetarëve të bashkive të vendit dhe kryeministrit Edi Rama, tha se asnjë nga të zgjedhurit vendorë të opozitës nuk e ka parë si një takim politik, pasi problematikat e qytetarëve janë më të rëndësishme.
Ai zbuloi se gjatë mbledhjes kanë marrë një garanci duke qenë se vendi është në rrugën e integrimit drejt BE, duke theksuar se nëse ata do të ndihen të pa respektuar do të ankohen te kancelaritë evropiane.
Po ashtu Curri tha se gjatë takimit u vendos që një herë në muaj kryebashkiakët të kenë një komunikim me ministrat përmes platformës Skype për të thelluar bashkëpunimin.
“Asnjë prej nesh nuk e ka parë në aspektin politik sepse problematikat e qytetarëve janë janë më të rëndësishme se disa gjëra të vogla. Morëm një farë garancie duke qenë se po shkojmë drejt BE, edhe bashkëpunimi me ministrat dhe u la të komunikojmë një herë në muaj në Skype me gjithë ministrat dhe kjo ndihmon në bashkëpunimin tonë.
Nuk besoj të ketë përplasje për shkak të politikës pasi garancia më e madhe për ne është BE. Nëse ne ndihemi të parespektuar do ankohemi te gjithë kancelaritë evropiane.
Ne jemi përfaqësues të qytetarëve, kur kryeministri dhe ministri i Pushtetit Vendor na thërrasin ne duhet t’i përgjigjemi për hir të interesave qytetare”, u shpreh ai.
Discussion about this post